अनमोल केसीको अभिनय रहने फिल्म ‘एक्स ९’ को सुटिङ फेरि पछि धकेलिएको छ । फेब्रुअरीको अन्त्यबाट छायाङ्कन हुने भनिएको फिल्मको सुटिङ कोरोनाको तेस्रो लहरका कारण सारिएको निर्देशक मुकुन्द भट्टले जानकारी दिए । यसअगाडि पनि फिल्मको सुटिङ पटक–पटक सर्दै आएको छ ।

‘कोरोनाको तेस्रो लहरका कारण फिल्मको छायाङ्कन फेरि सरेको छ’ निर्देशक भट्टले भने, ‘कलाकारलाई यसको जानकारी दिइसकेका छौँ ।’ यस अगाडि पनि फिल्मको सुटिङ पटक–पटक सर्दै आएको थियो । अनमोलका अलवा फिल्ममा सौगात मल्ल, पुष्प खड्का, राज कट्वाल पनि मुख्य भूमिकाका लागि छानिएका छन् । बलिउड अभिनेता सुनिल सेट्टीको पनि यसमा अभिनय रहने चर्चा छ ।

‘एक्स ९’ स्थगित भएपछि अनमोल अब बुबा भुवन केसीको फिल्मको काममा जुट्ने भएका छन् । भुवनले आफ्नो होम प्रोडक्सनमा अनमोल लिएर फिल्म ‘पारस’ बनाउन लागेका हुन् । फिल्मको छायाङ्कन फागुनदेखि सुरु हुने बताइएको छ ।

विज्ञापन