काठमाडौं । नेकपा एमालेका अध्यक्ष केपी शर्मा ओलीले प्रचण्ड र माधव नेपालको आफ्नो महत्वाकांक्षा र स्वार्थका कारण पार्टी विभाजन हुन पुगेको बताएका छन् । आज बालुवाटारमा जारी पार्टीको महाधिवेशन आयोजक कमिटी बैठकलाई सम्बोधन गर्दै ओलीले निकै दुःखका साथ एकीकृत गरिएको पार्टी प्रचण्ड र माधव नेपालका कारण विभाजन भएको आरोप लगाएका हुन् ।

बैठकमा बोल्दै अध्यक्ष ओलीले कम्युनिष्ट पार्टी एकताबद्ध बनाउन आफु रातो दिन अहोरात्र खटिरहेको बताउँदै भने, ‘हामी जिम्मेवार र अनुसाशीत भएकोले हामीले यो पार्टी एकता कायम गर्न प्रयास गर्छौ। यत्रो दुःख बाट एकीकृत गरेको पार्टी प्रचण्ड र माधव कमरेडहरुले आफ्नो महत्वाकांक्षा र स्वार्थको कारण हाम्रो पार्टी पुन विभाजित भयो।’

ओली पार्टी विभाजित नहुँदै प्रचण्ड र माधवले शत्रुतापूर्ण सम्बन्ध बनाइसकेको आरोप लगाउँदै सोही कारण आफुलाई साधारण सदस्यबाट समेत हटाउने दुस्साहस गरेको बताए । उनले भने, ‘त्यस्ता व्यक्तिहरु नेतृत्वमा हावी हुँदा त्यो पार्टी आकारमा त ठूलो देखिन्थ्यो तर समाजलाई गति दिन र नेतृत्व लिन सक्ने हैसियतमा हुने थिएन । अहिले पनि केही व्यक्तिहरु अराजक ढंगले लाग्ने। पार्टीकै नेताहरु बिरुद्ध विषवमन गर्ने । सरकारको आलोचना गर्ने। आन्दोलनका इमान्दार पंक्तिलाई बदनाम गराउने समाप्त गर्ने हिसाबले लागेका छन् ।’

विज्ञापन

ओलीले आफु अझै पनि लचिलो भएर आएको बताउँदै भने, ‘साथीहरुको पार्टी एकता बद्ध बनाउन कुनै पहल महसुस र अनुभूति देखिँदैन । पार्टी खोस्ने ढंगले कोही आएको हो भने त्यो सम्भव छैन।’ रातोपाटीबाट