एजेन्सी – बार्सिलोनामा एन्टोइन ग्रिजमनले आउने सिजनमा बढी महत्त्व पाउने सम्भावना देखिएको छ । क्लबका सुपर स्टार लियोन मेस्सी क्लबमा रहने पनि नरहेपनि नयाँ प्रशिक्षक रोनाल्ड कोम्यानले ग्रिजमनलाई बढी महत्व दिने प्रष्ट पारेका छन् ।

बार्सिलोनाका अध्यक्ष जोसेप मारिया बार्टोमेउले ग्रिजमनलाई आउने सिजनका लागि विक्री नहुने खेलाडी भनेर प्रष्ट पारेका थिए । त्यसपछि कोम्यानले ग्रिजमनलाई महत्त्व दिइने बताएका थिए । कोम्यानले ग्रिजमनलाई एटलेटिको म्याड्रिडमा खेलेको भूमिका नै बार्सिलोनामा पाउने प्रष्ट पारेको बताइएको छ ।

डच प्रशिक्षकले आफ्नो पहिलो पत्रकार सम्मेलनमा २९ वर्षे ग्रिजमनलाई उनको आफ्नो पोजिसन सेन्ट्रल फरवार्डमा खेलाउने प्रष्ट पारेका थिए । पछिल्लो सिजन बार्सिलोनामा भने उनले उक्त पोजिसनमा लगातार खेल्न पाएनन् । उनले १७ खेल सेन्टर फरवार्ड भूमिकामा खेलेका थिए । सुआरेज चोटग्रस्त हुँदा मात्र उनले नियमित त्यस पोजिसनमा खेलेका थिए ।

विज्ञापन

एट्लेटिको र फ्रान्सेली राष्ट्रिय टोलीमा ग्रिजमनले सेन्ट्रल फरवार्डको भूमिका निर्वाह गर्दै आएका छन् । उनकै प्रदर्शनमा फ्रान्सले सन् २०१८ मा विश्वकप उपाधि समेत जितेको थियो । बार्सिलोनामा भने अहिलेसम्म ग्रिजमनले अपेक्षा अनुसारको प्रदर्शन गर्न सकेका छैनन् ।