नागरिक रैबार। नेपाल पत्रकार महासंघ जिल्ला शाखा बाजुराले ६९ औं स्थापना दिवस बाजुरामा पनि विभिन्न कार्यक्रम गरी मनाउने निर्णय गरेको छ ।

बिहीबार मार्तडीमा बसेको पदाधिकारी तथा उपलब्ध सदस्यहरुको बैठकले स्थापना दिवसमा जिल्ला स्थित सम्पूर्ण पत्रकारहरुको रगत पहिचान गरी रगत आवश्यक परेकाहरुका लागि प्रदान गर्ने निर्णय गरेको सचिव रमित विकले बताएका छन ।

जिल्लामा रगत नपाएर बिरामीहरू जिल्ला बाहिर रिफर गर्नुपर्ने हुँदा उनिहरूलाई आवश्यक पर्ने रगतकाे अभाव नहाेस भन्ने उद्देश्यका साथ कार्यक्रमको आयोजना गरिने सचिव विकले बताए ।

सोही अवसरमा जिल्ला अस्पताल बाजुरामा रहेका बिरामीहरुलाई फलफूल समेत वितरण गरिने कार्यक्रम तय गरिएको छ । पत्रकार महासंघले स्थापना दिवस यसअघि विभिन्न कार्यक्रम गरी मनाउने गरेको छ ।

चैत १६ गते बिहान ८ बजे जिल्ला अस्पतालमा सम्पूर्ण पत्रकार तथा अन्यको उपस्थितिका लागि महासंघले आग्रह गरेको छ । महासंघका वरिष्ठ उपाध्यक्ष पदम बहादुर सिंहको अध्यक्षतामा बसेको बैठकमा उपाध्यक्ष संगीता तिमिल्सिना सहित पदाधिकारी र सदस्यहरुको उपस्थिति रहेको थियो ।