नागरिक रैबार/बाजुरा २२ जेठ।जिल्ला हुलाक कार्यालय बाजुराका कर्मचारीहरुको सक्रियतामा करिव ३० मिटर पक्की बाटो निर्माण गरिएको छ ।

जिल्ला हुलाक कार्यालय बाजुरामा कार्यरत कर्मचारीहरुको व्यक्तिगत लगानी र जनश्रमदानबाट मार्तडी बजारको खुलामंच जाने मुख्य सडकबाट हुलाक कार्यालय सम्म जाने करिव ३० मिटर बाटो पक्की गरिएको हो ।

हुलाकका कार्यालय बाजुरामा कार्यरत १२ जनाबाट प्रतिव्यक्ति ५ हजार रकम संकलन गरेर पक्की बाटो निर्माण गरिएको कार्यालय प्रमुख बुद्धबहादुर सोमैले बताएका छन् । कार्यालय प्रमुख सोमैका अनुसार बडीमालिका नगरपालिकासंग हुलाक कार्यालयसम्म जाने बाटो बनाई दिन आग्रह गर्दापनि नगरपालिकाले कुनै चासो नदेखाएपछि कार्यालयसम्म जाने बाटो आफैले निर्माण गर्नुपरेको हो ।

विज्ञापन

विगत लामो समय देखि जिल्ला हुलाक कार्यालयसम्म जाने बाटो साँघुरो र कच्ची रहेको थियो । कर्मचारीहरुको आफ्नै लगानीमा कार्यालय सम्म जोड्ने पक्की बाटो निर्माण भएपछि साना हलुका सवारी साधानहरु कार्यालयको गेटसम्म चल्ने भएका छन् ।

कार्यालय अगाडि जिल्ला समन्वय समितिको सरकारी निवास भएको र जिल्ला समन्वय समितिले समेत हुलाक कार्यालयसम्म पक्की सडक निर्माण गर्नका लागि जग्गा उपलव्ध गराएको कार्यालय प्रमुख सोमैको भनाई छ ।

यस अघि हुलाक कार्यालय सम्म जाने बाटो पक्की र साँगुरो भएपछि सेवाग्राहीहरुलाई कार्यालय सम्म जान समस्या हुने गरेको थियो । बजारको मुख्य सडकबाट हुलाक कार्यालयको गेटसम्म जाने बाटो पक्की बनेपछि सेवाग्राहीहरुलाई सहज भएको छ ।