२४ पुस, काठमाडौं । स्पानिस क्लब रियल मड्रिडका प्रशिक्षक जिनेदिन जिदान आइसोलेसनमा बसेका छन् । कोभिड-१९ पोजेटिभ भएको व्यक्तिसँग सम्पर्कमा रहेपछि जिदान सेल्फ आइसोलेसनमा बसेका हुन् ।
जसले गर्दा उनले बिहीबारको प्रशिक्षण समेत गुमाए । भाल्डेबेबासमा भएको क्लबमा प्रशिक्षणमा जिदान उपस्थित हुन सकेनन् ।
विज्ञापन
त्यसपछि जिदानले कोभिड-१९ परिक्षण गराएको र उनको एन्टिजन र पिसिआर परीक्षण दुवै नेगेटिभ आएको स्पानिस अनलाइन मार्काले उल्लेख गरेको छ ।
जिदानले अब स्पेन सरकार स्थानीय तह र ला लिगाको नियमअनुसार प्रोटोकल पालना गर्नुपर्ने हुन्छ ।
यदि जिदानले पोजेटिभ भएको व्यक्तिगतसँग धेरै नै नजिक भएका छन् भने उनले दुई हप्ताको सेल्फ आइसोलेसनमा बस्नुपर्ने हुन सक्छ । तर जिदानको परीक्षण नेगेटिभ आएकाले उनी १० दिन मात्र आइसोलेसन बसे पनि हुने मार्काले जनाएको छ ।
यदि त्यसो भएमा जिदानले शनिबार ओसासुनाविरुद्धको खेल मात्र गुमाउने छैनन् बिहीबार एथ्लेटिक विल्वाओविरुद्ध हुने स्पानिस सुपर कपको खेल पनि गुमाउनेछन् ।
यदि विल्वाओलाई पराजित गर्दै रियल सुपर कपको फाइनल पुगेमा जिदान उपलब्ध हुनेछन् ।
फेसबुक प्रतिक्रियाहरु