५ भदौ, जनकपुरधाम । प्रदेश २ को नामाकरण र स्थायी राजधानीको लागि प्रदेशका राजनीतिक दलहरु पनि जुर्मुराएका छन् । प्रदेशसभा सचिवालयले प्रदेशको नाम र राजधानी तोक्ने बिषयमा प्रस्ताव आह्वान गरेसँगै राजनीतिक दलहरु पनि जुर्मुराएका छन् ।

प्रदेशको नामाकरण र स्थायी राजधानी तोक्नका लागि प्रदेशसभा सचिवालयले बिहीबारसम्मका लागि प्रस्ताव पेश गर्न भनेको छ । प्रदेश २ का सांसदहरुले आफ्नो प्रस्ताव बिहीबारसम्म दर्ता गराउन सक्छन् ।

प्रदेशको नाम र स्थायी राजधानी तोक्न प्रदेशसभाभित्र राजनीतिक दलहरुको बैठक लगातार बसिरहेको छ । सत्तासिन समाजवादी, राष्ट्रिय जनता पार्टी (राजपा) का साथै प्रतिपक्षी नेपाल कम्युनिष्ट पार्टी (नेकपा) र नेपाली कांग्रेसले समेत बैठकलाई निरन्तरता दिएका छन् ।

विज्ञापन

नेकपा संसदीय दलको बैठक बुधबारदेखि प्रारम्भ भएको छ भने नेपाली कांग्रेस संसदीय दलको बैठक मंगलबारदेखि नै शुरु भएको छ । सत्तासिन राजपाको बैठक पनि यसै बिषयलाई लिएर मंगलबार बसेको छ । ‘हाम्रो संसदीय दलको बैठक मंगलबारदेखि प्रारम्भ भएको छ,’ कांग्रेस संसदीय दलका नेता रामसरोज यादवले भने, ‘यद्यपि, हामी निष्कर्षमा पुग्न सकेका छैनौं । बिहीबार पुनः बैठक बसेर निष्कर्षमा पुग्नेछौं ।’

नेकपा संसदीय दलका नेता सत्यनारायण मण्डलले बुधबारदेखि दलको बैठक शुरु भएको भन्दै बिहीबारसम्म निष्कर्षमा पुगिने जानकारी दिए ।

भौतिक पूर्वाधार मन्त्रीसमेत रहेका राजपा संसदीय दलका नेता जितेन्द्र सोनलले बुधबार आफूहरुको बैठकमा प्रदेशको नाम र स्थायी राजधानीबारे छलफल भएको बताए । उनले प्रदेश २ को नाम ‘मधेस’ हुनुपर्ने आफूहरुको प्रष्ट एजेन्डा रहेको बताए ।

मन्त्री सोनलले बिहीबार समाजवादी पार्टीका नेताहरुसँग संयुक्त बैठक बसी संयुक्तरुपमै प्रदेशको नाम र स्थायी राजधानी तोक्ने प्रस्ताव संयुक्तरुपमै लगिने जानकारी दिए ।

सत्तासिन समाजवादी र राजपा प्रदेशको नाम मधेश रहनुपर्नेमा एकमत देखिएका छन् भने प्रतिपक्षी नेकपा र कांग्रेसले ‘मिथिला’ वा ‘मिथिला–भोजपुरा’ नामाकरण गर्नुपर्नेमा जोड दिइरहेका छन् । यद्यपि स्थायी राजधानी जनकपुर नै हुनुपर्नेमा सबै दल एकमत जस्त देखिएका छन् ।

प्रदेश २ मा बिभिन्न विधेयकहरु सर्वसम्मतले पारित हुँदै आए पनि प्रदेशको नाम र स्थायी राजधानी तोक्न त्यत्ति सजिलो देखिएको छैन । यो कामका लागि दुई तिहाइ बहुमत आवश्यक पर्छ ।

तर सत्तासिन र प्रतिपक्षीको छुट्टाछुट्टै नाम भएपनि स्पष्ट दुई तिहाई भने कसैसँग छैन । सत्तासिन समाजवादीको ३०, राजपाको २५ सांसद छन् भने नेकपाको ३२ र नेपाली कांग्रेसको १९ सांसद छन् । संघीय समाजवादी फोरमको भने एक जना सांसद मात्रै छन् । अनलाइनखबरबाट