२२ असार, काठमाडौं । भारतीय तरकारीको विषादी परीक्षण गर्ने अडानबाट सरकार पछि हटेको विषय आजका अधिकांश दैनिक पत्रिकाहरुको पहिलो प्राथमिकतामा परेको छ । यसबाहेक आर्थिक, सामाजिक, राजनीतिकलगायतका विषय पनि पत्रपत्रिकाहरुले समेटेका छन् ।

नयाँ पत्रिकाले फरक कोणबाट यो विषय उधिनेको छ । नेपाल सरकार भारतबाट आउने तरकारीको विषादी परीक्षण गर्ने निर्णयबाट पछि हटे पनि भारतले भने लामो समयदेखि नेपाली तरकारी रोक्दै आएको नयाँ पत्रिकाकाे भनाइ छ ।

अन्नपूर्णले ‘उपभोक्तामाथि खेलवाड नगर’ शीर्षकमा सम्पादकीय नै लेखेर सरकारी रवैयाको विरोध गरेको छ । खेलाँचीको भरमा ल्याइने नीति अदृश्य शक्तिको इशारामा फिर्ता लिने प्रवृत्तिले सरकारको हैसियत उदांगो पारेको र त्यसकै पछिल्लो कडी तरकारीको विषादी परीक्षण निर्णय भएको अन्नपूर्णको निष्कर्ष छ ।

विज्ञापन

‘आमसरोकारको विषयमा सरकारले खेलाँची गर्न पाउँदैन । आमसरोकारको विषय मात्रै नभएर स्वदेशी किसान र आमउपभोक्ताको स्वास्थ्यसँग जोडिएका विषयमा सरकारले गरेको यो निर्णय घातक छ । सार्वजनिक चासो र जनहितका विषयमा अदृश्य शक्तिको दबावमा परेर नीति सच्याउनु लज्जास्पद छ’, अन्नपूर्णले आफ्नो सम्पादकीयमा लेखेको छ ।

कान्तिपुरले ‘सत्तारुढ सांसदकै प्रश्नः सरकार भारतसामु झुकेकै हो’ शीर्षक दिएर मुख्य समाचार लेखेको छ ।

कान्तिपुरका अनुसार भारतबाट आयातित तरकारी र फलफूलमा विषादी परीक्षण रोकेर सरकार भारतसामु झुकेको भन्दै सत्तारुढ दलकै सांसदले संसदीय दलको बैठकमा प्रधानमन्त्री केपी शर्मा ओलीको आलोचना गरेका छन् ।
हेर्नुहोस् आजका पत्रपत्रिकाका फ्रन्टपेज