लोकसभा चुनावलाई लक्षित गरेर मतदान अगावै प्रदर्शन गर्ने गरी भारतीय प्रधानमन्त्री नरेन्द्र मोदीको जीवनीमाथि भारतमा एउटा फिल्म बनेको थियो, ‘पीएम नरेन्द्र मोदी’ । तर उक्त फिल्मले लोकसभा चुनाव प्रभावित पार्ने भन्दै विपक्षी भारतीय कांग्रेसलगायतका दलले विरोध जनाए ।

भारतीय जनता पार्टी (भाजपा) सम्बद्ध व्यक्तिहरुले निर्माण गरेको उक्त फिल्म हेर्ने मतदातालाई त्यसले प्रभावित पार्नसक्ने र त्यो निर्वाचन आचारसंहिताविपरीत हुने भन्दै भारतीय कांग्रेसले आपत्ति जनाएको थियो । लोकसभा चुनाव सुरु हुनुभन्दा एक दिनअघि मात्रै भारतको निर्वाचन आयोगले चुनावका बेला यस्ता फिल्मले माहौल बिगार्न सक्ने भन्दै प्रदर्शनमा रोक लगाएको थियो । फिल्म निर्माता पक्ष रोक फुकुवाको माग गर्दै सर्वोच्च अदालत पनि पुगे तर सर्वोच्चले पनि प्रतिबन्ध फुकुवा गर्न अस्वीकार गरिदियो ।

अब भने फिल्म निर्माता पक्षले प्रदर्शनका लागि नयाँ मिति तय गरेको छ । निर्माता सन्दिप सिंहले आगामी मे २४ गतेबाट फिल्म प्रदर्शन गरिने जनाएका छन् । लोकसभा चुनावको नतिजा मे २३ मा आउँदैछ ।

विज्ञापन