काठमाडौं। नेपाल कम्युनिस्ट पार्टी नेकपाका नेता रामकुमारी झाँक्रीले आफूहरुले कहिल्यै नखोसिने लोकतन्त्रको लागि लडेको बताएकी छन्। बिहीबार प्रहरीलाई गिरफ्तारी दिनुअघि गरेको सम्बोधनमा उनले लोकतान्त्रिक अधिकार खोसिएको संकेत गरिन्। केही बेरअघि उनलाई प्रहरीले बुद्धनगरस्थित घरबाट गिरफ्तार गरेको हो।

गिरफ्तारी दिँदै रामकुमारी झाँक्रीले भनेकी छन्ः

हामीले लडेर ल्याएको लोकतन्त्र खोसिँदैछ। यो घडीसम्म आइपुग्दा आज पनि हामी लोकतन्त्रकै लागि लडिरहेका छौँ। केपी ओलीको सत्ताले मलाई राज्यविरुद्धको कसुरअन्तर्गत अनुसन्धान गर्न भन्दै पक्राउ गरेको छ। हामी कुन राजनीतिक अवस्थामा, कुनै मोडमा छौँ भन्ने कुरा तपाईं हामी सबैलाई थाहै छ। मैले पक्राउ पुर्जी ल्याए मात्रै गिरफ्तारी दिन्छु भनेकी थिएँ। सोहीअनुसार पक्राउ पुर्जी ल्याएपछि म आफ्नै निवासबाट गिरफ्तारी दिँदैछु।

विज्ञापन

राज्यको आदेश तामिले गर्ने सन्दर्भमा मेरो निवास वरिवरि खटिनुभएका सुरक्षा निकायका साथीहरूलाई पनि म धन्यवाद दिन चाहन्छु। भीडभाडमा तपाईंहरूमाथि कुनै खालको अप्ठेरो परेको भए क्षमता चाहन्छु।

केही दिनअघि गोरखामा आयोजित एक कार्यक्रममा उनले राष्ट्रपति विद्यादेवी भण्डारी विरुद्ध अभिव्यक्ति दिएका कारण प्रक्राउ गर्न प्रहरी उनको निवासमा पुगेको थियो। तर, प्रहरीले पक्राउ पूर्जी नलगेको कारण उनले सुरुमा गिरफ्तार दिन अस्वीकार गरेकी थिइन्। पछि प्रहरीले पक्राउ पूर्जी थमाएको थियो। उनलाई राज्य विरुद्धको कसुर लगाइएको छ।