बाँके प्रहरीले गएराति बसपार्कस्थित कृष्णप्रसाद वलीको घरमा छापा मारेर साढे २९ लाख रूपैयाँ सहित १० जुवाडेलाई पक्राउ गरेको छ।

गएराति साढे आठ बजे नेपालगञ्ज उप महानगरपालिका– ४ बसपार्कमा रहेको वलीको घरमा जुवातास खेलिरहेको भन्ने गोप्य सुचनाका आधारमा जिल्ला प्रहरी कार्यालय तथा वडा प्रहरी कार्यलयबाट खटिएको प्रहरी टोली सो घरमा गई खानतलासी गर्दा सन्तोष थापा समेतका १० जना व्यक्तिहरुले हारजित हुने गरी कटपट्टी तास खेलिरहेको अवस्थामा नियन्त्रणमा लिई उक्त जुवा खाल र निजहरुको साथबाट गरी जम्मा २९ लाख ४८ हजार ७ सय रूपैयाँ समेत बरामद गरेको हो ।

पक्राउ पर्नेहरूमा जिल्ला बाँके नेपालगञ्ज उपमहानगरपालिका–४ का सन्तोष थापा, मेघनाथ कुचबन्दिया, नविन घिमिरे, टोप बहादुर शाही, पब्लु भण्डारी, तरुण गौतम, रविन राणा, सन्तोष वली, कृष्णबहादुर सुवेदी र रहमान मिया रहेका छन् । उनीहरू बिरूद्व जुवा ऐन अनुसार म्याद लिएर थप अनुसन्धान भईरहेको बाँके प्रहरीले जनाएको छ।

विज्ञापन