सुदूरपश्चिममा सवारी दुर्घटनामा परी तीन वर्षमा झण्डै साढे पाँच सय जनाको मृत्यु भएको छ। प्रदेशका नौ वटै जिल्लामा आर्थिक वर्ष २०७३/७४ देखि २०७५/७६ सम्म भएका पाँच सय ८२ वटा दुर्घटनामा पाँच सय २२ जनाको मृत्यु भएको ट्राफिक प्रहरीले जनाएको छ।

प्रदेश ट्राफिक प्रहरी कार्यालय अत्तरियाका अनुसार तीन वर्षको अवधीमा पाँच सय २२ जनाको मृत्यु हुँदा एक हजार एक सय ३९ जना घाईते भएका छन्। आर्थिक वर्ष २०७३/७४ मा भएका एक सय ८४ दुर्घटनामा परी एक सय ३२ जनाको मृत्यु र तीन सय ४७ जना घाईते भएको प्रदेश ट्राफिक प्रहरी कार्यालयले जनाएको छ।

यस्तै आर्थिक वर्ष २०७४/७५ मा  एक सय ६४ दुर्घटनामा  एक सय ५८ जनाको मृत्यु, तीन सय ३८ जना घाईते भएका छन्। यसैगरी आर्थिक वर्ष २०७५/७६ मा भएका दुई सय ३४ दुर्घटनामा दुई सय २३ जनाको मृत्यु र चार सय ३४ जना घाईते भएको प्रदेश ट्राफिक प्रहरी कार्यालयको तथ्याङ्कमा उल्लेख छ।

विज्ञापन

तीन वर्षमा सात सय ८९ सवारी साधन मध्ये सबैभन्दा बढि मोटरसाईकल रहेका छन्। दुर्घटनामा पर्ने मोटरसाईकलको संख्या तीन सय दुई, बस ९५, ट्रक ६६, जीप कार एक सय ८ र एक सय २५  ट्रयाक्टर रहेका छन्।

चालु आर्थिक वर्षको पहिलो चौमासिकमा सवारी दुर्घटनामा परी सुदूरपश्चिममा थप ३१ जनाको मृत्यु भएको छ भने ९९ जना घाईते भएका छन्। प्रहरीले सवारी चालकको लापरवाही, सडकको दुरावस्था, तिव्र गति, मदिरा सेवन र यात्रुको लापरवाहीले सवारी दुर्घटना हुने गरेको बताउँदै आएको छ।