२९ असार, विराटनगर । उच्च अदालत विराटनगर, इलाम इजलासमा कार्यरत महिला कर्मचारीको हत्यामा संलग्न भएको आरोपमा नेपाल प्रहरीका असई पक्राउ परेका छन् ।

सोमबार बिहान कार्यालय परिसरमा मृत भेटिएकी महिला कर्मचारी बिमला कुमारी पराजुलीको हत्या आरोपमा इलाम इजलासका न्यायाधीशको सुरक्षागार्ड ३५ वर्षीय युवराज बानियाँ पक्राउ परेका हुन् । बानियाँ नेपाल प्रहरीका असई हुन् । पराजुली इलाम इजलासकी कार्यालय सहयोगी हुन् ।

विज्ञापन

बानियाँ इलाम इजलासमा कार्यरत न्यायाधीश शिवनारायण यादवका सुरक्षागार्ड हुन् । इलाम इजलासका मुख्य न्यायाधीश यादव भने केही दिनयता बिदामा थिए । यादवकै क्वाटरमा विवाद भएपछि बानियाँले पराजुलीको हत्या गरेको देखिएको प्रहरीले बताएको छ ।

जिल्ला प्रहरी कार्यालय इलामका प्रहरी उपरीक्षक महेन्द्र श्रेष्ठका अनुसार बनियाँले हत्यामा आफ्नो संलग्नता स्वीकार गरेका छन् ।

आइतबार साझाँ भेटघाटका क्रममा विवाद भएपछि असई बानियाँले पराजुलीको घाँटी थिचेर हत्या गरेको देखिएको उनले बताए । हत्या पछि शव झाडीमा फालेको अवस्थामा फेला परेको थियो ।

‘प्रारम्भिक अनुसन्धानका क्रममा विवादपछि बानियाँले हत्या गरेको देखियो,’ उनले भने,‘हत्याको कारण अबैध सम्बन्ध र लेनदेनको विवाद पनि छ ।’ बानियाँ र पराजुली दुवै विवाहित हुन् । उनीहरूबीच अवैध सम्बन्ध रहेको प्रहरीले बताएको छ ।

सोमबार बिहान पराजुलीको शव अदालत परिसरभित्र भेटिएपछि प्रहरीले अनुसन्धान सुरु गरेको थियो । बानियाँको संलग्नता देखिएपछि उनलाई राति नै पक्राउ गरी पाँच दिनको म्याद थप गरिएको प्रहरी उपरीक्षक श्रेष्ठले बताए ।

प्रहरीका अनुसार आइतबार बेलुका पराजुलीले बानियाँलाई फोन गरेर भेट्न बोलाएकी थिइन् । उनीहरुबीच न्यायाधीश क्वाटरमा भेटघाट भएको थियो । विदामा रहेका न्यायाधीशको क्वाटरको तालाचाबी बानियाँसँग नै थियो ।

क्वाटर भित्र विवादका क्रममा बलात्कारको मुद्दा लगाउछु भनेपछि घाँटी थिचेर हत्या गरेको बानियाँले बयान दिएको प्रहरीले बताएको छ । पराजुलीले लगाएको कानका गहना क्वाटर भित्र भेटिएका थियो। सिक्री भने बानियाँको साथबाट भेटिएको प्रहरीले बताएको छ ।