बझाङ, जेठ ३० । बझाङमा मोटरसाइकल दुर्घटनामा परि एक वडासदस्यको मृत्यु भएको छ । जयपृथ्वी नगरपालिका वडा नम्बर ७ का वडासदस्य नरेश महरको मृत्यु भएको हो ।

बिहीबार बिहान मोटरसाइकल सिक्ने क्रममा वडा नम्बर ७ का अध्यक्ष हरिचन्द्र जोशीसहित वडासदस्य नरेश महर घाइते भएका थिए । घाइते महरको उपचारका क्रममा जिल्ला अस्पतालमा मृत्यु भएको प्रहरीले जनाएको छ ।

वडा नम्बर ७ को से १ ब ११७७ नम्बरको मोटरसाइकल वडा सदस्य महरले चलाएको जनाइएको छ । घाइते वडाअध्यक्ष जोशिको जिल्ला अस्पतालमा नै उपचार भइरहेको छ । मृतक महरले विना हेलमेट मोटरसाइकल चलाएको प्रहरीको भनाइ छ ।

विज्ञापन

‘मृतक महरको टाउकोमा चोट लागेको थियो।’ जिल्ला अस्पतालका कार्यालय प्रमुख डाक्टर सन्दिप ओखेडाले भने । गम्भीर घाइते महरको थप उपचारका लागि काठमाडौं लैजानका लागि हेलिकोप्टर मगाएको भएपनि समयमा नै हेलिकोप्टर नपुग्दा उनको मृत्यु भएको आफन्तले जनाए।

सुदुरखबरबाट