विराटनगर– नेकपा एमालेका महासचिव शंकर पोखरेलले पार्टीनिकट पत्रकारहरूलाई सहमतिबाटै नेतृत्व चयन गर्न निर्देशन दिएका छन् ।विराटनगरमा आइतबार सुरू प्रेस चौतारी नेपालको महाधिवेशन उद्घाटन समारोहलाई सम्बोधनका क्रममा उनले यस्तो निर्देशन दिएका हुन् ।

‘महाधिवेशन आजका दिनमा जुन परिस्थितिमा हुँदै छ, अहिले हामीलाई एकता चाहिएको छ’, उनले भने, ‘हामीलाई प्रतिस्पर्धा होइन, सहमति चाहिएको छ । अहिले कांग्रेस र एमाले मिलिरहेका छन् । यो अवस्थामा सर्वसम्मत र एकताबद्ध रूपमा नेतृत्व निर्वाचित गर्नु होला ।’

उनले संगठनलाई छरितो र गतिशील संगठन चाहिने बताउँदै प्रेस चौतारी नेपालको आकार सानो र चुस्त हुनुपर्ने बताए ।

विज्ञापन

‘हामीलाई एकताबद्ध संगठन चाहिएको छ । सबैलाई एकताबद्ध गर्न जरुरी छ’, उनले भने, ‘हिजोको विभाजनको पीडा सम्झिऊँ । चुनाव होइन सहमति गरौँ । तपाईँहरूको संगठन तपाईँले बनाउने हो । एकताबद्ध र छरितो बनाउनुस् ।’

चौतारीको महाधिवेशनमा यसअघि प्रमुख अतिथिका रूपमा प्रधानमन्त्री केपी शर्मा ओली आउने तालिका थियो । तर, नेतृत्व चयनमा विवाद सुरू भएपछि ओलीले महासचिव पोखरेललाई विराटनगर पठाएका हुन् ।

ओलीले यसअघि नै वर्तमानमा उपाध्यक्ष गणेश पाण्डेलाई अध्यक्ष बनाउन निर्देशन दिएका थिए । त्यहीअनुसार जनसंगठन तथा मोर्चा विभाग प्रमुख भानुभक्त ढकाल र प्रचार विभाग प्रमुख राजेन्द्र गौतमले चुनाव नगराई सर्वसम्मतको सूचना भित्तामा टाँस्ने बताइरहेका छन् ।

तर, अर्का उपाध्यक्ष राजेश राईले चुनावी प्रतिस्पर्धाबाटै छिनोफानो हुनुपर्ने भन्दै अध्यक्षमा दाबी गरिरहेका छन् । वर्तमानमा कोषाध्यक्ष इन्द्र आचार्यले पनि अध्यक्षमा दाबी गरिरहेका छन् ।