अन्तरजातीय विवाह गरेका जोडीमाथि प्रहरी लगाएर ज्यादती गरेको भन्दै दलित अधिकारकर्मीले नेपाली कांग्रेसको केन्द्रीय कार्यालयमा प्रदर्शन गरेका छन् । शरीरमा नेल लगाएर अधिकारकर्मी खगेन्द्र सुनार नेतृत्वको टोली माइतीघरबाट पैदल नै सानेपासम्म पुगेर प्रदर्शन गरेको हो ।

उनीहरूले गृहमन्त्री रमेश लेखकमाथि कारबाहीको माग गरेका छन्। कारबाही नगरे थप आन्दोलन चर्काउने भनेर ‘चेतावनीपत्र’ बुझाएका छन् ।

अन्तरजातीय विवाह गरेका सर्लाही बरहथवाका सत्येन्द्रकुमार राम र नेहा राैनियारलाई प्रहरीले पटक-पटक पक्राउ गरी यातना दिएको आरोप लागेको छ । गृहमन्त्रीकै निर्देशनमा मुम्बईसम्म प्रहरी पठाएर पक्राउ गरिएको पीडितहरूले बताएका छन् ।

विज्ञापन

यो घटनामा गृहमन्त्री र प्रहरीमाथि छानबिन गर्न शुक्रबार पनि संसदमा आवाज उठेको छ । सांसदहरू प्रकाश ज्वाला, नारायणी शर्मा लगायतले छानबिनको माग गरेका हुन्।

राष्ट्रिय मानव अधिकार आयोगले घटनाको अनुसन्धान गरिरहेको छ । सर्लाही कांग्रेसका नेताहरूको दबाबमा गृहमन्त्रीले प्रहरी लगाएर उनीहरूमाथि पक्राउ गरिएको प्रारम्भिक अनुसन्धानमा देखिएको छ । उनीहरूलाई छुटाउनकै लागि पक्राउ गर्नेदेखि बालविवाहको मुद्दासमेत दायर गरिएको अधिकारकर्मीले बताएका छन् ।

सत्येन्द्र र नेहाको विवाहलाई सर्वाेच्च अदालतले समेत वैधानिकता दिइसकेको छ । तर, सत्येन्द्रविरुद्ध बालविवाहको मुद्दा जिल्ला अदालत, सर्लाहीमा कायमै छ । प्रहरीबाटै असुरक्षित भएको भन्दै उनीहरू अझै भूमिगत बस्न बाध्य छन् ।