नागरिक रैबार/बाजुरा ३१ जेठ।बुढीगंगा नगरपालिकाको पुन: निर्वाचनको मिति तोक्नका लागि बसेको सर्वदलीय बैठक निश्कर्ष विहिन भएको छ ।

सर्वदलिय बैठक मार्फत पुन: निर्वाचन गर्ने मिति तोक्न आज चौथो पटक बसेको  सर्वदलीय बैठक निष्कर्ष बिहिन बनेको हो । यस अघि गएको शुक्रबार बसेको सर्वदलीय बैठकले बुढीगंगाको निर्वाचनको मिति तोक्न जेठ ३१ गतेका लागि पुनः बैठक बोलाएको थियो ।

आज जिल्ला प्रशासन कार्यालय बाजुरामा बसेको सर्वदलीय बैठकमा सहभागि भएका नेपाली काँग्रेस र नेकपा एमालेका नेताहरुवीच चुनावको मिति तोक्ने बारे सहमति हुन नसकेपछि बैठक निष्कर्ष विहिन भएको सहायक प्रमुख जिल्ला अधिकारी लोकन्द्र बहादुर विष्टले बताएका छन् ।

विज्ञापन

मुख्य निर्वाचन अधिकृतको कार्यालयले आज चौथोपटक राखेको सर्वदलीय बैठक समेत निश्कर्ष विहिन भएपछि बुढीगंगाको निर्वाचनको मिति तय गर्न सकस देखिएको हो ।

निर्वाचन आयोगले यस अघि नै मुख्य निर्वाचन अधिकृतको कार्यालय बाजुरालाई बुढीगंगामा पुनः निर्वाचनका लागि मिति तय गरेर निर्वाचन गर्न निर्देशन दिएको छ भने आयोगले बुढीगंगामा पुनः निर्वाचन गर्नका लागि चौथो पटक लक्ष्मण बहादुर कठायतलाई निर्वाचन अधिकृत तोकेर पठाएको छ ।

आयोगले बुढीगंगामा पुनः निर्वाचन गर्ने निणर्य गरेको भएपनि मुख्य निर्वाचन अधिकृतको कार्यालय बाजुराले निर्वाचनको मिति तोक्न नसकेपछि बुढीगंगाको निर्वाचन अन्योलमा रहेको हो ।