अभिनेता प्रदीप खड्का दर्शकले रुचाएका हिरो हुन् । दर्शकले सधै उनलाई प्रेमी र धनी केटाको रुपमा पर्दामा देख्दै आएका छन् ।

अव भने प्रदीप गाउँले, गरिव र माया लाग्दो केटाको रुपमा देखिने भएका छन् । प्रदर्शनको तयारीमा रहेको फिल्म ‘प्रकाश’ मा प्रदीपले करियरकै पहिलो पटक फरक भूमिका देखिन लागेका छन् । जसको अहिले चर्चा हुने गरेको छ । हुन त दर्शकले उनलाई सधै लभर ब्वाइजको रुपमा रुचाएका छन् । उनको अनुहारको बनौटले पनि रोमान्टिक चरित्रमा सुहाउने छ । रोमान्टिक चरित्र अभिनयमा एउटा उचाइ बनाएका उनले किन प्रकाशका लागि रिक्स लिए त ? धेरैले नबुझेको प्रश्न हो । कलाकार बन्ने प्रयासमा करिअरलाई दाउमा राखेर ‘प्रकाश’ अभिनय गरेको प्रदीपले बताउँदै आएका छन् ।

प्रकाशको निर्देशक दिनेश राउतले गरेका हुन् । राउतले फिल्ममा प्रदीपलाई जुम्लाको एक विपन्न परिवारको युवकको भूमिकामा उतारेका छन् । फिल्म द्वन्द्वकालमा हराएका पिताको सपना साकार गर्न उनको छोराले गाउँको सरकारी विद्यालयमा शिक्षक बन्न गरेको संघर्ष विषयवस्तु बनाइएको छ । प्रदीपले त्यही छोराको भूमिका निर्वाह गरेका छन् । निर्माण टिमले यसअघि सार्वजनिक गरेको टिजर, गीत र पोस्टरमा उनको लुक्स हेर्दा प्रकाशको चरित्रमा आफूलाई ढाल्न उनले धेरै मिहिनेत गरेको सजिलै अनुमान गर्न गाहे पर्छ ।

विज्ञापन

हालै निर्माण युनिटले फिल्म भित्रको दुई तस्बिरहरु सार्वजनिक गरेको छ । तस्बिरमा प्रदीप सुख्खा जमिनमा हलो जोतिरहेका छन् । खुट्टामा चप्पल छैन । सर्ट र टाउजर मैलोले कटकटिएको छ । अनुहारमा खुशीका रेखा छैनन् । चिन्ता, पीडा, अभाव उनको अनुहारमा छल्किएको छ । यो तस्बिर हेर्दा उनलाई ‘प्रेमगीत’ को ‘प्रेम’ भनेर विश्वास गर्न मुस्किलै छ । उनले हलो जोतेको तस्बिर रियल झै लाग्छ । तस्बिर तस्बिर त उनका फ्यानले मन पराएका छन् । फिल्म मनपराउने हो होइन त्यो भने रिलिजसमयसम्म कुर्नुपर्ने देखिन्छ ।

१० भदौबाट सार्वजनिक प्रदर्शनमा आउँने फिल्ममा प्रदीपको अलवा दीया मास्के, रेनु योगी, प्रकाश घिमिरे, निरज पन्थी, गोविन्द सुनुवार, रामबाबु रेग्मी, लोकेन्द्र लेखक लगायतको पनि अभिनय छ ।
महेन्द्र अधिकारीको निर्माण रहेको फिल्म ‘प्रसाद’ जस्तो अब्बल फिल्म दिएका दिनेश राउतले निर्देशन गरेका कारण पनि प्रतीक्षित सूचीमा छ ।