काठमाडौं। लुम्बिनी प्रदेशका मुख्यमन्त्री शंकर पोखरेलले माधवकुमार नेपालको अगाडि रामबहादुर थापा बादल खास केही नभएको बताएका छन्। शनिबार सामाजिक सञ्जाल फेसबुकमार्फत् मुख्यमन्त्री पोखरेलले नेता नेपालको अगाडि बादल खास केही नभएको बताएका हुन्।

पोखरेलले लेखेका छन्,‘जसरी माधव कमरेडको तुलना वादल कमरेडसंग हुँदैन भनेर हामी भन्छौ, त्यसरी नै वादल कमरेडको तुलना खिमलाल देवकोटासंग हुनै सक्तैन। मनन गरौ।’

उनले गृहमन्त्री बादलको तुलना राष्ट्रियसभा सदस्यका उम्मेदवार खिमलाल देवकोटासँग हुनै नसक्ने उल्लेख गरेका छन्। वाग्मती प्रदेशमा राष्ट्रियसभा सदस्य उपनिर्वाचनका लागि नेकपा एमालेबाट रामबहादुर थापा र कांग्रेस माओवादी केन्द्र गठबन्धनको तर्फबाट डा. खिमलाल देवकोटाको उम्मदेवारी दिएका छन्। शुक्रबार वाग्मती प्रदेशको राजधानी हेटौंडास्थित निर्वाचन अधिकृतको कार्यालयमा थापा र देवकोटाले उम्मेदवारी दर्ता गराएका हुन्।