धनगढीः मोहना नदीमा मृत भेटिएका प्रहरी जवान रामबहादुर साउदको पनि विभत्स हत्या भएको खुलेको छ ।

साउदको घाटीमा धारिलो हतियार प्रहार गरी हत्या गरेको देखिएको प्रहरीले जनाएको छ ।

सुदूरपश्चिम प्रदेश प्रहरी कार्यालयका प्रवक्ता प्रहरी वरिष्ठ उपरिक्षक मुकेशकुमार सिहले साउदको धारिलो हतियार प्रयोग गरी हत्या गरेको देखिएको जानकारी दिए ।

विज्ञापन

यस्तै प्रहरी सहायक निरिक्षकको हराएको पेस्तोल पनि नदीमै भेटिएको उनले बताए ।

गत शनिबार राती अस्थायी प्रहरी पोष्टका इन्चार्ज प्रहरी सहायक निरिक्षक बिकसँगै साउद पनि नियमित गस्तीमा खटिएका थिए ।

प्रहरी सहायक निरिक्षक आइतबार बिहान नेपाल–भारत सीमा स्थित धनगढी उपमहानगरपालिका वडा नम्बर १० को मोहना नदीमा हत्या गरेको अवस्थामा फेला परेका थिए ।

बिक भेटिएको स्थानदेखि २ सय मिटर टाढा साउदको शव आज बिहान भेटिएको हो । यसैबीच दुवै प्रहरीको हत्यामा संलग्न अपराधिक गिरोहलाई प्रहरीले पक्राउ गरेको छ ।

जिल्ला प्रहरी कार्यालय स्रोतका अनुसार पक्राउ परेका १६ जना मध्ये केहीले हत्या गरेको स्वीकार गरिसकेका छन् भने केही व्यक्तिहरु अझै भागिरहेकाले खोजी भइरहेको छ ।

उनीहरुले तस्करीको सामान बरामद गर्न खोजेपछि प्रहरीमाथि हमला गरी हत्या गरेको प्रहरी समक्ष बयानका क्रममा स्वीकार गरेको स्रोतको भनाई छ ।

खेतमा हत्या गरेर दुवै प्रहरीलाई नदीमा बगाउने उद्देश्यले फालिएको उनीहरुले बताएका छन् ।