एजेन्सी । उत्तर प्रदेश (यूपी) रायबरेलीमा हाईस्कुलकी टपर छात्रा काजल सिंहलाई बछरान्वाका विधायक रामनरेश रावतले एक दिनका लागि आफ्नो जिम्मेवारी सुम्पिएका छन् । एक दिनका लागि निमित्त विधायक अर्थात् राज्यकी सांसद् बनेकी काजलले जनतालाई बोलाएर उनीहरुका समस्या सुनिन् । आम सर्वसाधारणले सुनाएका समस्याहरुलाई सुचीबद्ध गरेर उनले यसबारे तत्कालै निर्णय लिनका लागि सम्बन्धित अधिकारीहरुलाई निर्देशन दिइन् ।

काजल यही विधानसभा क्षेत्रकी बासिन्दा हुन् । यस वर्ष उनी हाईस्कुलको परीक्षामा ९२ दशमलव ३३ प्रतिशत अंक ल्याएर विधानसभामा प्रथम भएकी थिइन्, जिल्लामा उनी पाँचौ हुन् । यस उपलब्धिका लागि प्रदेश सरकारले विधानसभा क्षेत्रमा ३ सय ८० मिटर सडक निर्माण गर्दै सडकको नामाकरण विद्यार्थीको नामबाट गरिने घोषणा गरेको थियो ।

बछरान्वाकी यी छात्रालाई मिशन शक्ति अभियानअन्तर्गत बछरान्वाका विधायक रामनरेश रावतले एक दिनका लागि विधायक नियुक्त गरेका हुन् । काजलले यस अनुुभव बिलकुल नौलो रहेको बताइन् । ‘अधिकारीहरुलाई दिशा–निर्देश गर्दाको समय निकै राम्रो महसुस भयो,’ उनले भनिन्, ‘भविष्यमा म आईएएस बनेर समाजसेवा गर्न चाहन्छु ।’