काठमाडौं– क्विन्स इभेन्ट म्यानेजमेन्टले प्रालिले आयोजना गर्न लागेको ‘वुमन च्याम्पियन्स लिग’ (डब्लुसीएल) क्रिकेट प्रतियोतामा सहभागी टोली र मार्की खेलाडीको घोषणा गरिएको छ ।

शुक्रबार काठमाडौंमा पत्रकार सम्मेलन गरी आयोकले प्रतियोगितामा काठमाडौं, ललितपुर, पोखरा, चितवन र विराटनगरका टिमहरुले सहभागिता जनाउने बताएका छन् ।

जसमा ललितपुर फाल्कोन्स, पोखरा पल्टन, क्यापिटल्स रोयल्स काठमाडौं, चितवन राइनोज र विराटनगर टाइटन्स रहेका छन् । शुक्रबार आयोजकले टिमसँगै टिमका मालिक र मार्की खेलाडीको समेत घोषणा गरेको हो ।

विज्ञापन

जसमा ललितपुर फाल्कोन्सको मार्की खेलाडीमा राष्ट्रिय महिला टोलीकी खेलाडी नेरी थापा रहेकी छन् । पोखरा पल्टनको मार्की खेलाडीमा सीता राना मगर रहँदा क्यापिटल्स रोयल्स काठमाडौंमा रुवीना क्षेत्री रहेकी छन् ।

यस्तै, चितवन टाइगर्सको मार्की खेलाडीमा इन्दु बर्मा रकेकी छन् भने विराटनगर टाइटन्सलाई सरिता मगरले नेतृत्व गरेकी छन् ।

प्रतियोगितामा सहभागी टिम र मार्की खेलाडी घोषणा भइरहँदा यसअघि हुने भनिएको प्रतियोगिताको मिति सारेपनि खेलाडीहरुले लिग आयोजना गरेकोमा खुशी व्यक्त गरे ।

राष्ट्रिय टोलीकी कप्तान समेत रहेकी क्यापिटल्स रोयल्स काठमाडौंकी मार्की खेलाडी रुवीनाले प्रतियोगिताले महिला क्रिकेटको विकासमा महत्वपूर्ण भूमिका निभाउने प्रतिक्रिया दिइन् । उनले आफ्नो टिमका मालिकले आफूमाथिको विश्वासका लागि धन्यवाद भन्दै प्रतियोगिता आउने दिनमा अझै राम्रो हुने आशा व्यक्त गरिन् ।

यसैगरी, पोखरा पल्टनकी मार्की खेलाडी रहेकी सिताले महिला खेलाडीका लागि फ्रेन्चाइज लिग आफ्नो क्षमता प्रदर्शन गर्ने राम्रो प्लेटफर्म बन्ने विश्वास व्यक्त गरिन् ।

उनले नेपाली क्रिकेटमा आफूहरु निराश भइरहँदा शुरु भएका फ्रेन्चाइर्ज लिगहरुले आफूमा अझै राम्रो गर्नै हौसला मिलेको बताइन् भने चितवनकी मार्की खेलाडी इन्दु बर्माले आफू लिग खेल्न उत्साहित रहेको बताइन् ।

पत्रकार सम्मेलनमा उपस्थित राष्ट्रिय क्रिकेट टोलीका कप्तान पारस खड्काले नेपालमा क्रिकेटको माहोल बन्नुका साथै भविष्य समेत उज्वल रहेको बताए ।

उनले भने, ‘नेपालमा अहिले क्रिकेटले माहोल बनेको छ । पुरुष क्रिकेटमा पछिल्लो ४—५ वर्षमा कर्पोरेट क्षेत्रको सहयोमा फ्रेन्चाईज लिग भइरहेका छन् र कर्पोरेट क्षेत्रको सहयोगमै महिला लिग पनि भइरहेको छ । यसले खेलाडीहरुमा नयाँ उत्साह जगाएको छ ।”

यस्तै, राष्ट्रिय खेलकुद परिषद्का उपाध्यक्ष पिताम्बर तिमल्सिनाले सरकार र राखेपले निजी क्षेत्रको साथ र सहयोगको महत्व बुझेको भन्दै आगामी दिनमा खेलकुदमा निजी क्षेत्रसँग मिलेर अगाडि बढ्ने बताए ।

प्रतियोगिता जेष्ठ ३ गतेदेखि ९ गतेसम्म कीर्तिपुरस्थित त्रिवि क्रिकेट मैदानमा हुनेछ ।