नागरिक रैबार/ बाजुरा ३१ असार। बाजुराका बुढीनन्दा नगरपालिका, स्वामिकार्तिक खापर गाउँपालिका र गौमुल गाउँपालिकाले करार कर्मचारीलाई साउन १ गतेबाट हाजिर नगर्न आग्रह गरेको छ ।

आइतवार तिन वटै पालिकाकाले सार्वजनिक सूचना जारी गर्दै सबै वडा कार्यालय, स्वास्थ्य संस्थामा कार्यरत करार सेवाका कर्मचारीलाई हाँजिर नगर्न आग्रह गरेको हो ।

हालै सुदूरपश्चिम प्रदेश स्थानीय सेवा गठन तथा सञ्चालन ऐन, २०८१ लागू भएपछि अहिले स्थानीय तहहरु धमाधम सूचना जारी गरी रहेका छन् ।

पालिकाहरुलेहरुले उक्त ऐन बमोजिम करार वा ज्यालादारीमा नियुक्त गर्न नपाइने र अति आवश्यक भएमा स्वीकृत दरबन्दीमा कानुन बमोजिम गर्ने उल्लेख भएको जनाएको छ । त्यसैगरी, गाउँपालिकाहरुले ऐन अनुसार सहमति नहुन्जेलसम्म आगामी साउन १ गतेदेखि करारका कर्मचारीलाई हाजिर नगर्न आग्रह गरेको छ ।

पालिकाका र नेपाल सरकारको साझेदारीमा सञ्चालित कार्यक्रम बाहेकका करार कर्मचारीहरुलाई नगर्न÷ नगराउन अनुरोध गरेको सूचनामा उल्लेख छ । त्यस्तै कोही कसैले हाजिर गरे वा गराएको पाइएमा स्वयम् जिम्मेवार हुने समेत जानकारी दिएको छ ।