नागरिक रैबार/बाजुरा २८ साउन।  बाजुराको स्वामिकार्तिक खापर गाउँपालिका–१ बर्कुमा आज साँझ भएको ट्याक्टर दुर्घटनामा एकजनाको मृत्यु भएको छ भने एकजना गम्भीर घाइते भएका छन्।

मृत्यु हुनेमा गाउँपालिका–१ बर्कुका ३८ वर्षीय पदम बुढा रहेका छन्। गाउँपालिका–३ जुकुका लोकेन्द्र रोकाया गम्भीर घाइते भएका छन्। घाइतेको बर्कु स्वास्थ्य चौकीमा उपचार भइरहेको प्रहरीले जनाएको छ।

जिल्ला प्रहरी कार्यालय बाजुराका अनुसार जोरुबाट स्याउ बोकेर पिलुचौरतर्फ आउँदै गरेको भे ००१ ट ०४८० नम्बरको ट्याक्टर बर्कु स्वास्थ्य चौकी नजिकै करिब साँझ ६ बजे सडकबाट करिब ३०० मिटर तल खसेको हो।

विज्ञापन

ट्याक्टरमा चारजना सवार भए पनि चालक रविन्द्र नाथ र अर्को नाम नखुलेको व्यक्ति सुरक्षित रहेर फरार भएका छन्। उनीहरूको खोजी कार्य भइरहेको प्रहरी निरीक्षक देव बहादुर चौधरीले जानकारी दिए।

मृतक बुढाको भोलि पोस्टमार्टम हुने प्रहरीले जनाएको छ।