नागरिक रैबार/बाजुरा २९ बैशाख। बाजुराको बुढीगंगा नगरपालिकामा एकै दिन ७ वटा संस्थागत भवनहरु उद्घाटन गरिएका छन् । नगरपालिकाले आइतबार आफ्ना ५ वटा वडा कार्यालय, २ वटा स्वास्थ्य संस्था र सीप विकास तालिम केन्द्र भवनको औपचारिक रुपमा उद्घाटन गरेको हो ।

समृद्धिका लागि बुढीगंगा विकास कचहरी कार्यक्रमको दोस्रो दिन पालिका भित्रका २,४, ५, ९ र १० नम्बर वडा कार्यालय उद्घाटन गरिएका हुन् भने  यस्तै बुढीगंगा सीप विकास तालिम केन्द्र र पालिकाको २ र १० मा बनेका स्वास्थ्य सेवा केन्द्रका भवन पनि उद्घाटन गरिएको नगरपालिकाले जनाएको छ ।

बुढीगंगा समृद्धिको आधारका लागि पालिकामा जारी कचहरी कार्यक्रम अन्तरगत दलिय सहकार्य र समझदारीको सन्देश दिने गरी पालिकाले सबै जिल्लाका पूर्व र बहालवाला जनप्रतिनिधीहरु मार्फत पालिकाका भाैतिक संरचनाहरुको उद्घाटन गरिएको नगर प्रमुख रामबहादुर बाँनियाले बताएका छन् । पालिकाले आज प्रशासनीक भवन, १ र ८ नम्बर वडा कार्यालय भवनको उद्घाटन गर्ने तयारी गरिएको छ ।

विज्ञापन

जस अनुसार पालिकाको २ नम्बर वडा कार्यालयको उद्घाटन निवर्तमान प्रतिनिधी सभा सदस्य लालबहादुर थापा, ४ नम्बर वडा कार्यालयमा प्रदेश सभा सदस्य पदम शाही, ५ नम्बर पूर्व प्रदेश सभा सदस्य बल्देव रेग्मी, ९ नम्बर नगर प्रमुख रामबहादुर बानीया, १० नम्बर पूर्व प्रदेश सभा सदस्य प्रकाश शाह, बुढीगंगा सीप विकास केन्द्र पूर्व प्रदेश प्रमुख देवराज जोशीले उद्घाटन गरेका हुन् ।

यस्तै २ नम्बरमा बनेको आधारभुव स्वास्थ्य केन्द्रको संविधान सभा सदस्य पेम्बा गुरुग भोटे र १० नम्बरमा बनेको आधारभुत स्वास्थ्य सेवा केन्द्र भवनको संविधान सभा सदस्य बसुन्धरा रोकायाले गरेका हुन् । पालिकाको प्रशासनीक भवनको पूर्व मन्त्री कर्णबहादुर थापाले बैशाग २९ गते विशेष कार्यक्रमका बीच उद्घाटन गर्ने तयारी गरिएको छ ।

६ नम्बर वडा कार्यालय भवनको प्रदेश सभा सदस्य पूर्व मन्त्री नरेश बहादुर शाही, १ नम्बर वडा कार्यालयको पूर्व मेयर दिपक शाह, ८ नम्बर वडा कार्यालयको उद्घाटननगर उपप्रमुख माया कुँवरले गर्नेछन् । ७ नम्बर वडा कार्यालय भवन निर्माणको काम भने अधुरै छ ।

नगरपालिकामा रहेका १० मध्ये ९ र सबै स्वास्थ्य चौकी, पालिका भवन सरकारी मापदण्ड अनुसार निर्माण गरिएका छन् । नौ वटा वडा कार्यालयका संस्थागत भवन, स्वास्थ्य संस्था, सीपविकास तालिम केन्द्र र पालिका भवन निर्माण गर्नेमा बुढीगंगा जिल्लाकै पहिलो पालिका हो ।