नागरिक रैबार/बाजुरा २० साउन।  सुदूरपश्चिम प्रदेशको प्रसिद्ध धार्मिक तथा पर्यटकीय स्थल बडीमालिकाको पूजाका लागि बाजुराको सरकारी टोली आज त्यसतर्फ प्रस्थान गरेको छ ।

सहायक प्रमुख जिल्ला अधिकारी सितल बहादुर रावल र बडीमालिका नगरपालिका ४ का वडा अध्यक्ष अर्जुन नाथको नेतृत्वमा सरकारी टोली बडीमालिका प्रस्थान गरेको हो।

सरकारी टोलीले बाजुराको बडीमालिका माताको मन्दिरमा साउन २३ गते चतुर्दशीका दिन लाग्ने धार्मिक मेलामा पूजाआजा गर्ने भएको छ ।

विज्ञापन

मार्तडीको मालिका माईको मन्दिरमा विधिपूर्वक पूजा गरेर सरकारी टोली आज विहान बडीमालिकाको यात्रामा निस्केको छ ।
हरेक वर्ष साउन शुक्ल चतुदर्शीका दिन लाग्ने बडीमालिकाको मेलाका लागि जिल्लाको सरकारी टोली पुजा सामाग्री लिएर त्यसतर्फ प्रस्थान गरेको हो ।

बडीमालिको दर्शनका लागी तीर्थमा निस्केको सरकारी टोलीलाई नेपाली सेना, नेपाल प्रहरी र ससस्त्र प्रहरीले सलामी अर्पण गरी बाजागाजासहित बिदाई गरेको हो ।

मेलाका लागि हप्तादिनदेखि नै तीर्थयात्री त्यसतर्फ गईरहेका छन् । बडीमालिकामा क्षेत्रमा २२ पाटन र खेतीबेतीलगायत रमणीय ठाउँको अवलोकनसँगै मनोकांक्षा समेत पूरा हुने अपेक्षाका साथ यात्रुहरू बडीमालिका जाने गर्दछन् ।