नागरिक रैबार/बाजुरा ४ मंसिर। बाजुराको बडीमालिका नगरपालिका र खप्तड क्षेडेदह गाउँपालिका एक महिनादेखि प्रमुख प्रशासकीय अधिकृत विहिन बनेका छन् ।

खप्तड क्षेडेदह गाउँपालिकाका असोज ८ गतेदेखि र बडीमालिका नगरपालिका असोज २३ गतेदेखि प्रमुख प्रशासकीय अधिकृत विहिन बनेका हुन् ।
खप्तड क्षेडेदहका प्रमुख प्रशासकीय अधिकृत नन्दकृष्ण पाध्याय र बडीमालिका नगरपालिकाका प्रमुख प्रशासकीय अधिकृत बमबहादुर केसीको सरुवा भएपछि यी दुई स्थानीय तह महिनादिन यता प्रमुख प्रशासकीय अधिकृत  विहिन बनेका हुन् ।

दशैं र तिहार सकिएर कार्यालय खुलेकाे २ साता वित्न लाग्दापनि अझै सम्म यी दुई पालिकामा प्रमुख प्रशासकीय अधिकृत को आउने भन्ने टुंगो लाग्न सकेको छैन् ।बडीमालिका नगरपालिकामा ०८० माघ १६ बाट नगरपालिकाकाे प्रमुख प्रशासकीय अधिकृतका रुपमा आएका बमबहादुर केसीको १ वर्ष नपुग्दै असोजमा सरुवा भएपछि नयाँ प्रमुख प्रशासकीय अधिकृतको खोजीका लागि बडीमालिका नगरपालिकाका मेयर अमरबहादुर खड्का संघीय राजधानीमा गएर मन्त्रालय धाएका थिए । तर पनि यहाँ अहिलेसम्म कोही हाकिम आउन सकेका छैनन् ।

विज्ञापन

त्यस्तै खप्तड क्षेडेदह गाउँपालिकाका प्रमुख प्रशासकीय अधिकृत नन्दकृष्ण पाध्याय पनि सरुवा मागेर अन्यत्रै ठाउँमा गएपछि नयाँ प्रमुख प्रशासकीय अधिकृतको खोजीमा गाउँपालिकाका अध्यक्ष दिलबहादुर रावत पनि संघीय राजधानी काठमाण्डौमा गएर मन्त्रालय धाईरहेका छन् ।

यी दुवै पालिकामा दशैतिहार अघि नै प्रमुख प्रशासकीय अधिकृतहरुको सरुवा भएपछि महिना दिनयता पालिकाका कामहरु ठप्प भएका छन् । दैनिक जसो पालिकामा आउने सेवाग्राहीहरु भने कार्यकारी अधिकृत नभएकै कारण रित्तो हात घर फर्किने गरेका छन् ।

बडीमालिका नगरपालिकाको एक शाखाका प्रमुखले भने प्रमुख प्रशासकीय अधिकृत सरुवा भएको यति लामो समय भईसक्दा पनि हाकिम आउने नआउने अझै फिक्स भएको छैन् । नगरपालिकाको बार्षिक निति तथा कार्यक्रम अनुसार तयार भएका कतिपय कामहरु कार्यकारी अधिकृत नहुँदा गर्न सकिएका छैनन् ।

यी दुवै स्थानीय तहमा प्रमुख प्रशासकीय अधिकृत नहुँदा २०८१÷८२ को वार्षिक निति तथा कार्यक्रम अनुसार गरिने सवै योजनाका कामहरु ठप्प भएका छन् ।

बडीमलिका नगरपालिका स्थापनाको ९ वर्ष यता १५ जना प्रमुख प्रशासकीय अधिकृतहरु फेरिएका छन् । बाजुरामा आउने कर्मचारी र जनप्रतिनिधि विच राजनीतिक आस्था र विचार नमिलेकै कारण प्रतिसोध पूर्ण व्यवहार हुने गरेकाले स्थानीय तहमा प्रमुख प्रशासकीय अधिकृतहरु विवादित बन्ने गरेकाे कतिपय जानकारहरु बताउँछन् ।

महिनादिन देखि यि दुवै पालिका प्रमुख प्रशासकीय अधिकृत विहिन हुँदा पनि जनप्रतिनिधिहरुले अहिलेसम्म कार्यकारी अधिकृतको व्यवस्थापन गर्न नसकेपछि स्थानीयहरु आक्रोसित बनेका छन् ।