नागरिक रैबार/बाजुरा १० असार। बाजुराको हिमाली गाउँपालिकाले यस वर्षबाट गाउँपालिका भित्रका एकल पुरुषलाई भत्ता र उमेर पुगेपछि मात्रै विहे गर्ने छोरीलाइ सम्मान गर्ने निति तथा कार्यक्रम ल्याएको छ ।

त्यस्तै पालिकाले सार्वजनिक गरेको आर्थिक वर्ष २०८०/८१ को नीति तथा कार्यक्रममा अपाङ्गता भएका बालबालिका र र पाठेघर खसेका महिलाको उपचार पालिकाले आफै गर्ने नितिलाइ अघि सारेको छ ।

पालिका भित्र पाठेघर खसेका महिला र अपाङ्गता भएका बालबालिकाको उपचार गाउँपालिकाले गरिदिने नीति पारित गरेको प्रमुख प्रशासकीय अधिकृत राजबहादुर भण्डारीले बताएका छन् ।

विज्ञापन

यसै आगामी आर्थिक वर्षबाट पालिकाले कृषि एम्बुलेन्स सञ्चालन गर्ने, कक्षा १२ सम्म कुनै प्रकारको शुल्क नलिने र उच्च शिक्षा हाँसिल गरेर मात्र कानुनी रुपमा उमेर पुगेर बिबाह गर्ने छोरीलाई सम्मान सहित पुरस्कारको ब्यबस्था गर्ने नीति पारित गरिएको गाउँपालिकाले जनाएको छ ।

त्यस्तै पालिकाको सवै भन्दा दुर्गम गाउँ गुम्बामा स्वास्थ्य संस्था सञ्चालन गर्ने, पालिका भरि भूगोललाई ध्यानमा राखेर थप ४ ओटा बर्थिङ सेन्टर स्थापना गर्ने, एकल पुरुष भत्ता ब्यबस्थापन गरिने नीति कार्यक्रममा समेटिएको पालिकाको भनाइ छ।