नागरिक रैबार/बाजुरा १ चैत्र। जिल्लाको बडीमालिका नगरपालिका वडा नम्वर ७ मा स्थित ढम्कनेका कृषकहरुलाई आलु खेतीमा आत्मनिर्भर बनाईने भएको छ ।
कृषि ज्ञान केन्द्र बाजुराले जिल्लामा सवै भन्दा बढी आलु उत्पादन हुने क्षेत्रका रुपमा रहेको ढम्कनेका कृषकहरुलाई आलु खेतिमा आत्मनिर्भर बनाउन लागेको हो ।
विज्ञापन
मंगलबार कृषि ज्ञान केन्द्र बाजुराले लिवर्ड पोखराका प्राविधिक सहितको टिमलाई लिएर ढम्कनेका कृषकहरुलाई आलुबालीमै आत्मनिर्भर बनाउने गरी कृषक पाठशाला संचालन गरेर उनीहरुको खेतबारीमा आलु बाली लगाउने तरिका बारे सिकाईएको छ ।
बडीमालिका वडा नम्वर ७ को समन्वय तथा कृषि ज्ञान केन्द्रको सहयोगमा लिवर्ड पोखराको प्राविधिक टिमले ढम्कनेको आलुको जात पहिचान गर्ने र विउ प्रमाणिकरणका लागि आलुको अनुसन्धान, आलु वालिमा रोगकिराको व्यवस्थापन र कम्पोष्ट मल बनाउने तरिका, आलुका प्रजाती, उत्पादन क्षमता लगायतका बारेमा खेतबारीमै पुगेर कार्यक्रम संचालन गरेको वडा अध्यक्ष धर्मराज पाध्यायले बताएका छन् ।
ढम्कनेका कृषकहरुले वर्षेनी आलु खेती गर्दै आएका भएपनि अपेक्षा अनुसारको आलु उत्पादन गर्न नसकेकोले आलुको उत्पादनमा आगामी वर्षहरुमा वृद्धि गर्ने, बजारीकरण गर्ने उद्देश्यले ३० ठाउँबाट आलुका प्रकारहरु संकलन गरी कृषकहरुको खेतबारीमै कृषक पाठशाला संचालन गरेर आलुबाली लगाईएको कृषि ज्ञान केन्द्र बाजुराका निमित्त कार्यालय प्रमुख हरीप्रसाद पनेरुले बताएका छन् ।
ढम्कनेबासीको प्रमुख आम्दानीको श्रोतका रुपमा रहेको आलु बाली भएकाले आलु बालीको जात पहिचान गर्ने उद्देश्यले कृषककै खेतवारीमा गएर कृषक पाठ शाला मार्फत आलु बालीमा सहभागिता मुलक जातीय सुधार कार्यक्रम गरिएको थियो ।
ढम्कनेमा मात्र १ जना कृषकले प्रत्येक वर्ष २० देखि ६० क्विन्टल आलु उत्पादन गर्ने गरेका छन् । करिव १ सय बढी घरधुरी रहेको ढम्कनेका सवैले आलु खेति गर्दै आएका छन् ।
फेसबुक प्रतिक्रियाहरु