धनगढीः स्याङ्जा चापकोटकी किस्मी थापा एयर होस्टेस हुँदा उनकी आमा विष्णुदेवी औधी खुशी भएकी थिइन्। गाउँघरमा किस्मीकै चर्चा हुन्थ्यो। त्यसले विष्णुदेवीको हर्ष बढेको थियो। तर, आइतबार मुस्ताङमा भएको तारा एयरको ट्वीनेटर जहाज दुर्घटनाले उनका सबै खुशीहरू खोसिदिएको छ।

२६ वर्षीया किस्मीसहित जहाजमा सवार २२ यात्रु र चालक दलका सदस्य मुस्ताङको मानापाथी हिमालछेउ मुलखर्कमा सदाका लागि अस्ताए। किस्मीले काठमाडौंमा बसेर हवाई करिअर अघि बढाईरहेकी थिइन्। पाँच वर्षदेखि उनी तारा एयरमा कार्यरत थिइन्। उनी मनिषा थापाका नामबाट परिचित थिइन्। दुई भाइको पढाइ खर्च धानेकी किस्मी आमा विष्णुदेवीको दाहिने हात थिइन्।

छोरी उडेको जहाज सम्पर्कविहीन भएको खबर पाउँदा विष्णुदेवी छाँगाबाट खसेझै भइन्। उनलाई सम्हाल्न निकै मुस्किल भयो। उनी रुँदै पोखरा पुगेकी छिन्। सोमबार बिहान जहाज दुर्घटनाग्रस्त अवस्थामा भेटिएपछि तारा एयरले परिवारलाई शिक्षण अस्पताल काठमाडौं बोलाएको छ। ‘शव लिन बोलाएको होला बोलाएको’ किस्मीका मामाका छोरा दिवस रम्तालले भने, ‘काठमाडौं जाने कि यतै पर्खिने सल्लाह गर्दैछौं।’

विज्ञापन