काठमाडौँ — कोकाकोलाले स्प्राइटको बोतल परिवर्तन गर्ने भएको छ । ६० वर्षदेखि हरियो प्लास्टिकको बोतलमा पाइँदै आएको स्प्राइट अबदेखि भने पारदर्शी प्लास्टिकको बोतलमा पाइने भएको छ ।

बुधबार कम्पनीले आउँदो अगस्ट १ देखि पुन: प्रशोधन गर्न सकिने प्लास्टिकको बोतलमा स्प्राइट बेच्ने घोषणा गरेको हो । कम्पनीलाई वातावरणमैत्री बनाउँदै लैजाने योजनाअन्तर्गत यो कदम चालिएको कम्पनीले जनाएको छ । अहिलेको स्प्राइटको हरियो बोतल नयाँ बोतल बनाउनका लागि पुन: प्रशोधन गर्न नसकिने खालको हो ।

‘बोतलबाट रङ हटाउँदा पुन: प्रशोधन गरिएका वस्तु गुणस्तरीय हुन्छन्,’ कोकाकोलालाई पुन: प्रशोधन कार्यमा सघाइरहेको आर थ्री साइकलकी प्रमुख कार्यकारी अधिकृत जुलियन ओचोआले सीएनएनसँगको कुराकानीमा भनेका छन्,’अब आउने बोतलको प्रशोधन गरी पुन: बोतल नै बनाउन सकिन्छ ।’ बोतलको स्वरूप र प्याकेजिङ डिजाइन पनि परिवर्तन हुने कम्पनीले जनाएको छ ।

विज्ञापन

प्लास्टिक फोहोरले वातावरण प्रदूषण गराएको भन्दै कोकाकोलाको आलोचना हुँदै आएको छ । ब्रेक फ्री फ्रम प्लास्टिक नामक संस्थाले गरेको एउटा अनुसन्धानमा २०२० मा कोकाकोला प्लास्टिक प्रदूषणमा विश्वकै एक नम्बरमा रहेको थियो ।

विश्वका ५१ देशका समुद्री किनार पार्कजस्ता सार्वजनिक स्थानमा १३ हजार ८ सय ३४ वटा कोकाकोलाका बोतल भेटिएका थिए । सन् २०१८मा कम्पनीले ‘वर्ल्ड विदाउट वेस्ट’ अभियान सुरु गरेको थियो । अभियानअन्तर्गत कम्पनीले २०३० सम्म बिक्री भएका सबै बोतल र क्यान संकलन गरी पुन: प्रशोधन गरिने जनाएको थियो ।