मुगु — जिल्लाका प्रमुख राजनीतिक दलहरू स्थानीय तहको निर्वाचनलाई लक्षित गर्दै गाउँ पस्न थालेका छन् । सरकारले वैशाख ३० गते स्थानीय तहको निर्वाचनको मिति घोषणा गरेपछि कांग्रेस, एमाले, नेकपा एकीकृत समाजवादी, माओवादीलगायत प्रमुख राजनीतिक दलहरूले कार्यकर्ता भेटघाट, पार्टी भेला, प्रशिक्षण, बैठकलगायत कार्यक्रमलाई तीव्रता दिएका हुन् ।

जाडो छल्न प्रदेश राजधानी सुर्खेत र तराईका विभिन्न जिल्लामा गएका राजनीतिक दलका नेताहरू जिल्ला फर्किएर गाउँ केन्द्रित हुन थालेका छन् । ‘अब चुनाव लागिसक्यो,’ कांग्रेस सभापति ऐनबहादुर शाहीले भने, ‘कसरी पार्टीलाई जिताउने भनेर गाउँगाउँमा कार्यकर्ता भेटघाट र भेलाहरू सुरु गरिसकेका छौं ।’ उनीसहित उपसभापति हरिजंग शाही, कर्ण रावल, सचिव लोकेन्द्र मल्ल, महासमिति प्रतिनिधि तिलकबहादुर मल्ललगायत नेताहरूले शनिबारदेखि छायानाथरारा नगरपालिकाका विभिन्न बस्तीमा कार्यकर्ता भेटघाटलाई तीव्रता दिएका छन् । उनीहरू फरकफरक वडामा गएर विभिन्न राजनीतिक कार्यक्रममा सहभागी हुन थालेका हुन् । पार्टीले प्रसिद्ध धार्मिक स्थल थार्पमस्टा मन्दिरमा पूजाआजा गरी गाउँ जागरण अभियान सुरु गरेको जनाएको छ ।

एमालेका जिल्लास्तरीय नेताहरू पनि अहिले विभिन्न गाउँमा खटिएका छन् । बाम, लुम, रुघालगायत बस्तीमा कार्यकर्ता भेटघाटको कार्यक्रम सकिएको एमाले जिल्ला अध्यक्ष जितबहादुर मल्लले बताए । ‘सरकारका अरू तयारी बाँकी होलान्, पार्टीका तर्फबाट भने अनौपचारिक चुनावी अभियान सुरु भइसकेको छ,’ उनले भने, ‘जसरी पनि पार्टीलाई १ नम्बरको पार्टी बनाउन आवश्यक तयारी सुरु भइसकेको छ ।’ उनले कार्यकर्ता र मतदातासमक्ष पुगेर इच्छा, आकांक्षा र गुनासो बुझ्ने कामको सुरुवात गरिसकिएको जानकारी दिए ।

विज्ञापन

एकीकृत समाजवादीले पनि चुनावी अभियान सुरु भइसकेको जनाएको छ । पार्टीले पहिलो चरणमा सोरु गाउँपालिका र छायानाथरारा नगरपालिकामा कार्यकर्ता भेला र संगठन निर्माण अभियान सकिएको जनाएको छ । माओवादी केन्द्रले पनि कार्यकर्तालाई चुनावी अभियानमा सक्रिय बन्न निर्देशन दिइसकिएको जनाएको छ । दलहरूले कार्यकर्ता भेटघाटसँगै अन्य दलका कार्यकर्तालाई आफ्नो पार्टीमा प्रवेश गराउने कार्यक्रम जारी राखेका छन् । भेटघाटका लागि गाउँमा पुगेका नेताहरूलाई कार्यकर्ताले विभिन्न योजना माग्न थालेको स्थानीय अगुवा कमल शाहीले बताए । ‘अहिले त सबै दलका ठूला नेताहरू गाउँमै छन्, कार्यकर्ताका गुनासा सुन्न, आश्वासन दिन र पार्टीका विभिन्न समितिहरू पुनर्गठन गर्न नेताहरूलाई भ्याइनभ्याइ छ,’ उनले भने, ‘नेताहरू गाउँ पसेपछि कार्यकर्ताहरू पनि उत्साही बनेका छन् ।’

३६ हजार मतदाता

मुगुमा ३६ हजार ६ सय ५५ मतदाता छन् । जिल्ला निर्वाचन कार्यालयका अनुसार राष्ट्रिय जनगणना–२०७८ को प्रारम्भिक नतिजाअनुसार जिल्लामा ६६ हजार ६ सय ५५ जनसंख्या भए पनि झन्डै आधाले मात्र मतदाता नामावलीमा आफ्नो नाम दर्ता गराएका छन् । २०७४ को स्थानीय तह निर्वाचनमा २७ हजार ४ सय ३५ मतदाता थिए । जिल्ला निर्वाचन कार्यालयका सूचना अधिकारी धनकृष्ण बडुवालले झन्डै ५ वर्षको अवधिमा करिब १० हजार मतदाता थपिएको बताए । चार वटा स्थानीय तह रहेको मुगुमा ४५ वडा छन् । कान्तिपुरबाट साभार