काठमाडौँ — बलरहरूको उच्च प्रदर्शन र आसिफ शेखको सानदार अर्धशतकमा नेपालले विश्वकप क्रिकेट लिग २ मा बुधबार स्कटल्यान्डलाई ५ विकेटले पराजित गरेको छ । स्कटल्यान्डमाथि नेपालको यो पहिलो विजय हो । राष्ट्रिय टोलीको संरचनामा नेपालले यसअघि स्कटल्यान्डलाई पराजित गर्न सकेको थिएन् ।

आसिफले ६२ बलमा ७१ रन बनाएपछि नेपालले १ सय ४५ रनको लक्ष्य २५.१ ओभरमै पूरा गर्‍यो । आसिफले १० चौका र १ छक्का प्रहार गरेपछि कमजोर ब्याटिङ प्रदर्शन गर्दै आएको नेपालको विजय सहज बनेको थियो । आसिफले कुशल भुर्तेलसँग पहिलो विकेटमा ८ ओभरभित्र ४७ रन जोडेका थिए । ठूलो स्कोर खेल्न नसकिरहेका कुशलले २८ बलमा ४ चौकासहित २७ रन बनाए ।

आफूले सामना गरेको पहिलो बलमै तेस्रो स्लिपमा क्याच फुत्किएपछि जीवनदान पाएका आसिफले एन्ड्रिएन नेललाई पुल गर्दै छक्का प्रहार गरी आफ्नो अर्धशतक पूरा गरेका थिए । एकदिवसीय अन्तर्राष्ट्रियमा उनको यो चौथो अर्धशतक हो ।

विज्ञापन

देव खनाल ४, दीपेन्द्रसिंह ऐरी ३ र आरिफ शेख १ रनमै आउट भए पनि उपकप्तान रोहित पौडेलले अविजित ३४ रन बनाउँदै नेपाललाई विजय दिलाए । उनले ३१ बल खेली ५ चौका प्रहार गरे । सो क्रममा उनले लिस्ट ‘ए’ मा एक हजार रन पूरा गरे ।

यसअघि मध्यम गतिका बलरहरूको सानदार प्रदर्शनमा नेपालले स्कटल्यान्डलाई १ सय ४४ रनमै रोकेको थियो । नेपालले टस जितेपछि ब्याटिङमा आएको घरेलु टोली स्कटल्यान्ड ४२.५ ओभर खेली अलआउट भयो ।

एकदिवसीय अन्तर्राष्ट्रियमा स्कटल्यान्डको एसोसिएट राष्ट्र विरुद्ध यो चौथो न्यून स्कोर हो । गेभिन मेन र हमजा ताहिरले १० औं विकेटका लागि ४९ रनको साझेदारी गरेपछि स्कटल्यान्डको स्कोर हेर्नलायक बनेको हो । नवौं नम्बरमा ब्याटिङ गरेका मेन ६४ रन बनाई अविजित रहे । उनले ५७ बल खेली ७ चौका र १ छक्का प्रहार गरे । मेनले एकदिवसीय अन्तर्राष्ट्रियमा पहिलो अर्धशतक बनाएका हुन् । ताहिर ४३ रन बनाई ७ रनमा अन्तिम खेलाडीको रुपमा आउट भए । मार्क वाटले १७ रन बनाए ।

सोमपाल कामी र आदिल अलामले उत्कृष्ट बलिङ गरे । सोमपालले १० ओभरमा ४३ र आदिलले १० ओभरमा १ मेडन राख्दै ३१ रन खर्चेर ३/३ विकेट लिए । कप्तान सन्दीप लामिछानेले १० ओभरमा १ मेडन राख्दै ३५ रन खर्चेर २ विकेट लिए । करण केसी र दीपेन्द्रको नाममा १/१ विकेट रहयो ।

नेपालले १० मध्येको ७ विकेट विकेटकिपरको पछाडिको क्षेत्रमा लिएको थियो । कुशल भुर्तेलले ४ क्याच लिए । उनी एकदिवसीय अन्तर्राष्ट्रियमा एकै खेलमा सर्वाधिक क्याच लिने सुचिमा संयुक्त दोस्रो नम्बरमा आए । दक्षिण अफ्रिकाका जोन्डी रोड्सले १९९३ मा वेस्ट इन्डिजविरुद्ध हिरो कपमा एकै खेलमा ५ क्याच लिएका थिए । कुशलबाहेक अन्य ४४ अवसरमा एकै खेलमा ४ क्याच लिएको कीर्तिमान छ ।

लिग २ मा आफ्नो पाँचौं शृंखला खेलिरहेको नेपाल सोमबार नामिबियासँग ४० रनले पराजित भएको थियो । स्कटल्यान्डले आइतबार शृंखलाको पहिलो खेलमा नामिबियालाई ७७ रनले पराजित गरेको थियो । स्कटल्यान्ड २२ खेलमा ३० अंकसहित दोस्रो स्थानमा छ । नेपाल १८ खेलमा १७ अंकसहित सात राष्ट्र सहभागी लिग २ को अंक तालिकामा पाँचौं स्थानमा उक्लेको छ । नामिबियाको १६ खेलमा १६ अंक छ ।

समान ३६ खेल खेलेपछि लिग २ को शीर्ष ३ मा पर्ने टोलीले २०२३ को जुन–जुलाईमा जिम्बावेमा हुने विश्वकप छनोटमा स्थान बनाउने छ । शीर्ष ३ सँगैं लिग २ को चौथो र पाँचौं स्थानमा रहने टोलीले अर्को चार वर्षका लागि एकदिवसीय अन्तर्राष्ट्रिय मान्यता कायम राख्ने छ ।