नागरिक रैबार बाजुरा बैशाख ३० बाजुरा। जिल्लाको बुढीगंगा नगरपालिकाका निर्वाचन अधिकृतले राजीनामा दिएका छन् । बुढीगंगा नगरपालिकामा निर्वाचन अधिकृतका रुपमा खटिएका निर्वाचन अधिकृत कृष्ण साप्कोटाले निर्वाचनमा तोकिएको जिम्मेवारीबाट राजिनामा दिएका हुन् ।

बुढीगंगा नगरपालिकामा आफु असुरक्षित रहेको भन्दै मतदानको दिन अधिकांश मतदान केन्द्रमा तनाव तथा स्वतन्त्र र निष्पक्ष मतदान प्रभावित भएको भन्दै राजिनामा दिएको बुझिएको छ । राजिनामा स्वीकृत भए नभएको जानकारी हुन सकेको छैन । आफु असुरक्षित हुनुका साथै हुलहुज्जत हुनसक्ने भन्दै उनले राजिनामा दिएको मुख्य निर्वाचन अधिकृत माधवप्रसाद घिमिरेले बताएका छन ।

पालिकाका विभिन्न केन्द्रमा स्वतन्त्र तथा निष्पक्ष मतदान हुन नसकेको भन्दै शुक्रवार कांग्रेस कार्यकर्ताले निर्वाचन अधिकृत साप्कोटालाई नियन्त्रणमा राखेका थिए । मतदान कै दिनदेखि आफु असुरक्षित रहेको भन्दै शनिबार दिउसो कार्यालय छाडेर सदरमुकाम मार्तडी आउँदै गर्दा उनलाई एमाले कार्यकर्ताले बार्जुगाढबाट नियन्त्रणमा लिएर पालिकास्थित निर्वाचन कार्यालयमा फर्काएका छन् र मतपेटिका बुझ्न लगाएका छन । यतिबेला उनको थप सुरक्षा ब्यवस्था मिलाइएको मुख्य निर्वाचन अधिकृत घिमिरेले बताएका छन ।

विज्ञापन

बुढीगंगा नगरपालिका अन्तर्गतका विभिन्न मतदान केन्द्रमा शुक्रबार मतदानका क्रममा झडप, उम्मेदवार घाइते, बुथ कब्जा, उम्मेदवार मतदान केन्द्रबाट लखेटिएका, सुरक्षाकर्मीले मतेपटिका छाडेर मतदान केन्द्रबाट भागेका लगायतका घटना भएका थिए ।

उपसचिव सापकोटा मतदानकै दिनदेखि दोहोरो दवावमा रहेका र शनिबार दिउँसोसम्म दश वटा वडा रहेको बुढीगंगाका कुनै पनि मतदान केन्द्रको मतपेटिका निर्वाचन कार्यालयले बुझ्न नमानेको थिएन । एमालेले मत पेटिका बुझेर मतगणना गर्न दवाप दिइरहेको छ भने कांग्रेसले केही मतदान केन्द्रमा एकलौटी भएको आरोप लगाउँदै फेरी मतदानको माग गरिरहेको देखिन्छ । बुढीगंगाका २,३,५ र ९ मा एमालेले बुथ कब्जा गरेको कांग्रेसको आरोप छ भने ४ र ७ नम्बरमा कांग्रेसले बुथ कब्जा गरेको एमालेको दावी छ ।

बुढीगंगाका ६ वटा मतदान केन्द्रमा वडाध्यक्षका उम्मेदवारहरु मतदान केन्द्रबाटै लखेटिएका र मतदान गर्न नपाएका सर्वसाधारणले बताएका छन् । जिल्ला निर्वाचन ब्यवस्थापन समितिले सर्वदलीय बैठक बसिरहेको भएपनि सहमति हुन सकिरहेको छैन । बुढीगंगाका अधिकांश मतदानकेन्द्रहरु शुक्रबार तनावग्रस्त भएका थिए । त्यसक्रममा एमाले र कांग्रेसको आ(आफ्नो वर्चस्व रहेको केन्द्रमा एकलौटी मतदान गरेका स्थानीयको भनाई छ ।