नागरिक रैबार/बाजुरा २७ असार।जिल्लाको बुढीगंगा नगरपालिका वडा नम्बर १ मा कार्यालय सहयोगी नै वडाध्यक्षमा निर्वाचित भएर आएका छन् । झन्डै चार वर्ष कार्यालय सहयोगी भएर काम गरेका रणबहादुर थापा असार २३ गते भएको निर्वाचनमा एमालेबाट वडा अध्यक्षमा ४ सय १६ मत ल्याएर निर्वाचित भएका छन् ।

नेपाली कांग्रेसका लोग बहादुर थापाले ३ सय ५८ मत ल्याएर थापासंग पराजित भएका छन् । एमालेबाट वडा अध्यक्षसहित सवै जना निर्वाचित भएका छन् । चार वर्षको अन्तरालमा थापा कार्यालय सहयोगीबाट वडा अध्यक्ष भई जनप्रतिनिधि हुन सफल भएका छन् ।
२०७५ साल देखी वडा नम्बर १ मा वडा कार्यालय सहयोगीका रुपमा काम गर्दै आएका थापाले वडा अध्यक्ष पदमा लड्नका लागि चैत महिनामा राजिनामा दिएका थिए ।

मासिक १४ हजार पारिश्रमिक पाउने गरि नगरपालिकाबाट करार नियुक्ति पाएका थापाले कार्यालय सहयोगी पदमा काम गरिरहेका थिए । नेकपा एमालेले २०७९ को स्थानीय तह निर्वाचनमा सोही वडाको अध्यक्षको उम्मेदवार बनाउन सहमति गरेपछि चैत महिनामा राजिनामा दिएर थापा एमालेको सक्रिय राजनीतिसंगै चुनावमा होमिएका थिए ।

विज्ञापन

थापा कार्यालय सहयोगीमा नियुक्ति हुदा नेपाली काँग्रेसका वडा अध्यक्षमा राजेश कुमार सिंह सहितको पुरै वडामा काँग्रेस प्यान विजयी थिए । वडा अध्यक्षमा निर्वाचित भएका थापा साविकको बह्रमतोला गाबिसमा सामाजिक परिचालक कार्यक्रर्ता रहेका थिए । देशमा संघियता लागु भएपछि उनको जागिर गयो । २०७५ सालमा फेरी आफ्नै वडामा कार्यालय सहयोगिको नियुक्ति पाएर काम गरेका थिए ।

निर्वाचित थापा कार्यालय सहयोगी भएपनि उनले वडामा हुने सबै काम गरेको वताउछन् । थापाले भने आफुलाई जनताका दुख, पिर मर्का समस्या राम्रोसँगै बुझेको छु, मैले वडामा कार्यालय सहयोगीता हुदा पनि धेरैको सेवा गरेको वताए । थापाले जितेको वडा काँग्रेसको बाहुल्यता भएको वडाका रुपमा चिनिन्छ ।

यसपालिको निर्वाचनमा भने वडामा थापा सहित एमालेको पुरै प्यानल एमाले विजयी भएको छ । बुढिगंगा नगरपालिका बैशाख ३० गते भएको चुनावमा धाधली भएको भन्दै निर्वाचन आयोगले असार २३ गते पुन निर्वाचन गरेको हो । नगरप्रमुख उपप्रमुख सहित ७ वटा वडा एमाले र ३ वटा वडा काँग्रेसले जितेको छ ।