नागरिक रैबार। बाजुराको बडीमालिका नगरपालिका वडा नम्बर ३ मा रहेको चोयाकोट मावि तीन तारे विद्यालयको रुपमा घोषणा गरिएको छ । नेपाल सरकारले निर्धारण गरेका सूचक पुरा गरेपछि विद्यालयलाई तीन तारे विद्यालयका रुपमा घोषणा गरिएको हो ।

चोयाकोट माविलाई तीन तारे विद्यालयको रुपमा औपचारिक कार्यक्रमका बीच नगर प्रमुख अमर खड्काले घोषणा गरेका हुन् । बडीमालिका नगरपालिका भित्र तीन तारे विद्यालयका रुपमा घोषणा हुने चोयाकोट मावि चौथो विद्यालय हो ।

यस अघि बालमन्दिर आधारभुत विद्यालय, नेरा मावि र सत्यश्वरी आधारभुत विद्यालय राप्का तीन तारे घोषणा भइसकेका छन् । सरकारले प्रर्याप्त खानेपानी, स्वच्छ र सफा शौचालय, महिनावारी स्वच्छता, दिवा खाना व्यवस्थापन, गुणस्तरीय शिक्षण सिकाइ, शान्त र बालमैत्री वातावरण, बालमैत्री शिक्षण सिकाइ र व्यवहार, सुविधा सम्पन्न संरचना भएको विद्यालयलाई तीन तारे घोषणा गर्ने नीति लिएको छ ।

विज्ञापन

बडीमालिका नगरपालिका, युनिसेफ नेपाल र विद्यालयको सयुक्त सहकार्यमा विद्यालयलाई तीन तारे घोषणा गर्न सफल भएको विद्यालयका प्रअ गोरखबहादुर थापाले बताएका छन् । चोयाकोट माविले राज्यले निर्धारण गरेका अधिकांश सूचक र मापदण्द पुरा गरेको प्रअ थापाले बताएका छन् ।

तीन तारे विद्यालय हाम्रो शान, विद्यार्थी शिक्षक र अभिभावक सबैको स्वाभिमान भन्ने मुल नाराका साथ विद्यालयलाई भव्य कार्यक्रमका साथ घोषणा गरिएको हो । खानेपानी, सरसफाइ र स्वच्छताको विषयलाई अनिवार्य पुरा गर्नु पर्ने मापदण्ड रहेको छ ।

घोषणा कार्यक्रममा नगर प्रमुख अमर खड्का, प्रमुख प्रशासकीय अधिकृत रंगमल विक, वडा अध्यक्ष डबल रोकाया, एमाले नेता वीरबहादुर रावल सहीत सहभागि थिए । त्यसैगरी विश्व खाद्य कार्यक्रम, विश्व शिक्षा, आइडीएस नेपाल, पीसविन, सेतो गुराउँस लगायतका गैर सरकारी संस्थाका प्रतिनिधी पनि सहभागि थिए । विद्यालयमा २ सय बढी विद्यार्थी अध्ययनरत छन् ।