नागरिक रैबार/बाजुरा १९ जेठ।जिल्लाको स्वामीकार्तिक खापर गाउँपालिकाले फोरजि सहितको नेपाल टेलिकमको टावर निर्माण गर्ने निर्णय गरेको छ ।

गाउँपालिकामा नवनिर्वाचित जनप्रतिनिधिहरु आएर पदभार ग्रहण गरेसंगै बसेको गाउँपालिकाको पहिलो बैठकले उक्त निर्णय गरेको हो ।
गाउँपालिकाका स्थानीयहरुलाई संचारको पहुँचमा ल्याउन फोरजि सहितको टेलिफोन टावर निर्माण गर्ने निर्णय गरिएको गाउँपालिका अध्यक्ष भरतबहादुर रोकायाले बताएका छन् ।

गाउँपालिकाको पहिलो बैठकले भर्खरै सम्पन्न भएको स्थानीय तहको निर्वाचनलाई शान्तिपूर्ण बातावरणमा सम्पन्न गर्ने मतदाता, सुरक्षाकर्मि, राष्ट्र सेबक कर्मचारी, म्यादी प्रहरी लगायत निर्वाचनमा खटिने सबैलाई धन्यवाद समेत दिएको छ ।

विज्ञापन

त्यसैगरी बाजुरा, हुम्ला, मुगु र कालिकोट जिल्लालाई बेस बनाई एक बहुप्राविधिक शिक्षालय खोल्न पहल गर्ने निणर्य गरेको छ । गाउँपालिकामा कृषि उत्पादन बढाउन कृषक पेन्सन योजना लागू गर्ने भएको छ ।

गाउँपालिकामा आकस्मिक बिरामी र सुत्केरी महिलालाई एम्वुलेन्स सेवा निःशूल्क बनाउने निणर्य गरेको छ । त्यस्तै गाउँपालिकामा वडा बिभाजन गर्न पहल गर्ने निणर्य समेत गरेको गाउँपालिकाले जनाएको छ ।