१६ असार, काठमाडौं । कृषि तथा वन र इन्जिनियरिङ सेवातर्फ रिक्त दुई सचिव पदका लागि ६ जना सिफारिशमा परेका छन् । सचिव बढुवा सिफारिश समितिको मंगलबार बसेको बैठकले दुई सेवाका तीन-तीन जना सहसचिवलाई सचिवमा बढुवा गर्न सिफारिश गरेको हो ।

लोक सेवा आयोगका अध्यक्ष माधवप्रसाद रेग्मी नेतृत्वको बढुवा सिफारिश समितिको बैठकले कृषि तथा वन सेवातर्फ डा. कृष्णप्रसाद आचार्य, निरु दाहाल पाण्डे र दीपक खनाललाई बढुवा गर्न सिफारिश गरेको छ । यसैगरी इन्जिनियरिङ सेवातर्फ प्रमिला बज्राचार्य, सुशीलचन्द्र तिवारी र गोपालप्रसाद सिग्देल सिफारिशमा परेका छन् ।

यसअघिको सोमबार बसेको बढुवा सिफारिश समितिको बैठकले डा. दामोदर रेग्मीलाई पनि सचिव बढुवा गर्न सिफारिश गरेको थियो ।

विज्ञापन

आगामी मन्त्रिपरिषद बैठकले रिक्त पदमा सचिव बढुवाको निर्णय गर्ने छ । हाल प्रशासन सेवाका ५, इन्जिनियरिङ सेवाका २ र कृषि तथा वन सेवाका १ गरी ८ सचिव पद रिक्त छन्।