२०७२ सालमा आएको विनाशकारी भूकम्पले हरिहर भवनस्थित पुस्तकालयको भवनान क्षतिपुर्‍याएको थियो । भवन नभएपछि पुस्तकालयका महत्त्वपूर्ण पुस्तकहरू अलपत्र अवस्थामा रहेकाले सरकारले जमलमा नै नयाँ भवन बनाउने निर्णय गरेको शिक्षा मन्त्रीका प्रेस सल्लाहकार विमल खड्काले बताए ।

शिक्षा मन्त्रालयको प्रस्तावमा मन्त्रिपरिषद्ले जमलस्थित कित्ता नं. १२७० मा पुस्तकालय भवन बनाउने निर्णय गरी विस्तृत परियोजनाको काम अघि बढाउन स्वीकृति समेत दिएको उनले बताए ।

जमलमा रहेको ७ रोपनी १५ आना ३ पैसा ३ दाम जग्गामा पुस्तकालय भवन निर्माण हुनेछ।यसअघि केपी ओली नेतृत्वको सरकारले २०७५ असोज २८ मा नेपाली मौलिक कला, संस्कृति र परम्परा झल्किने डिजाइनसहितको राष्ट्रिय पुस्तकालय भवन जमलमै निर्माण गर्ने निर्णय गरेको थियो।

तर २०७७ साउन ५ गते सोही नेतृत्वको सरकारले ‘अर्को निर्णय नभएसम्म जमलको जग्गामा पुस्तकालयको भवन निर्माण नगर्ने/नगराउने’ निर्णय गरेपछि काम रोकिएको थियो।त्यस्तै राष्ट्रिय पुनर्निर्माण प्राधिकरणले पनि टुँडिखेल क्षेत्रलाई खुला र विस्तार गर्ने योजना अन्तर्गत त्रिचन्द्र क्याम्पसको केही भाग जमलमा सार्ने र राष्ट्रिय पुस्तकालयलाई अन्यत्र स्थानान्तरण गर्नुपर्ने जनाएको थियो।