१५ फागुन, काठमाडौं । खोटाङको दिक्तेल रुपाकोट मझुवागढी नगरपालिकामा एकजना ज्येष्ठ नागरिक लामो समयदेखि बहिष्करणमा परेको खुलेको छ ।

दलित समुदायका व्यक्तिले दिएको दही खाएको आरोपमा टंकप्रसाद आचार्य आफन्त र छिमेकीबाट बहिष्करणमा परेको राष्ट्रिय मानव अधिकार आयोगले जनाएको छ ।

विज्ञापन

आचार्यले २०७५ असारमा जिल्ला समन्वय समिति खोटाङले आयोजना गरेको जातीय भेदभावविरुद्धको सहभोज कार्यक्रममा दलित समुदायका व्यक्तिले दिएको दही खाएका थिए । त्यसयता उनी समाजमा बहिष्करण हुँदै आएको अनुगमनका क्रममा खुलेको आयोगले जनाएको छ ।

घटना बाहिर आएपछि मानव अधिकार आयोगका सचिव वेद भट्टराईसहित अधिकृतहरु संलग्न उच्चस्तरीय टोलीले अनुगमन गरेको थियो ।

अनुगमन टोलीले पीडित आचार्यको घरमै पुगेर विष्तृत जानकारी लिएको छ ।

अनुगमनपछि विज्ञप्ति जारी गर्दै आयोगले जातीय भेदभावविरुद्धको अभियानमा संलग्न ज्येष्ठ नागरिकलाई समाजले गौरवको रुपमा लिनुपर्नेमा बहिष्कार गर्नु निन्दनीय भएको बताएको छ ।

घटनामा संलग्नलाई कारबाही गरी पीडितलाई मानसिक पीडाबाटमुक्त गर्न जिल्ला प्रशासन कार्यालय खोटाङ र नगरपालिकालाई आयोगले पत्रसमेत लेखेको छ ।