संसद विघटनविरुद्ध विपक्षी गठबन्धनको रिट तयार, सांसदहरुले हस्ताक्षर गर्दै
समाचार
संसद विघटनविरुद्ध विपक्षी गठबन्धनको रिट तयार, सांसदहरुले हस्ताक्षर गर्दै
नागरिक रैबार
आइतवार, जेष्ठ ९, २०७८
अ
अ
अ
९ जेठ, काठमाडौं । विपक्षी दलहरुको गठबन्धनले संसद विघटनविरुद्ध सर्वोच्च अदालतमा दायर गर्ने रिट तयार पारेका छन् ।
प्रधानमन्त्रीको सिफारिसमा राष्ट्रपति विद्यादेवी भण्डारीले गत शुक्रबार मध्यरातमा संसद विघटन गरेपछि विपक्षी दलले १४९ जना सांसदको हस्ताक्षरसहित सर्वोच्च अदालतमा रिट दिन लागेको हो ।
रिटमा धारा ७६ (५) अनुसार प्रधानमन्त्री नियुक्तिका लागि नेपाली कांग्रेसका सभापति शेरबहादुर देउवाले १४९ सांसदको हस्ताक्षरसहित गरेको दावी वैधानिक रहेको दावी गरिएको छ । कांग्रेस नेता रमेश लेखकका अनुसार रिटमा देउवालाई प्रधानमन्त्री नियुक्तिका लागि परमादेश माग गरिएको छ ।
विज्ञापन
त्यस्तै प्रतिनिधिसभा विघटन गर्ने सरकारको सिफारिस खारेज गरी संसद अधिवेशन बोलाउन अन्तरिम आदेश पनि माग गरिएको लेखकले बताए ।
रिटको मस्यौदा तयार गर्न कांग्रेस नेता लेखक, नेकपा माओवादी केन्द्रका नेता देव गुरुङ, कानुन व्यवसायीहरु सतीशकृष्ण खरेल, योगेन्द्र कार्की, गोविन्द बन्दी, मुक्ति प्रधान संलग्न भएका थिए ।
अब रिटमा देउवालाई धारा ७६ (५) अनुसारको प्रधानमन्त्री नियुक्तिका लागि राष्ट्रपतिसमक्ष हस्ताक्षर बुझाउने १४९ सांसदले हस्ताक्षर गर्नेछन् । सबै १४९ सांसदले हस्ताक्षर गरेपछि सर्वोच्च अदालतमा दर्ता गर्ने नेताहरुले बताएका छन् ।
उक्त रिटमा हस्ताक्षर गर्न सांसदहरु नयाँ वानेश्वरस्थित संघीय संसद भवनमा उपस्थित भएका छन् ।
फेसबुक प्रतिक्रियाहरु