सिरम इन्सिटिट्यूटले बुधबार कोरोनाविरुद्धको कोभिसिल्ड खोपको नयाँ दर तय गरेको छ । अबदेखि सिरमले निजी अस्पताललाई ६ सय भारतीय रुपैयाँमा दिनेछ । यसअघि २ सय ५० भारतीय रुपैयाँमा सिरमले खोप उपलब्ध गराउँदै आएको थियो ।

राज्यका लागि खोपले ४ सय भारतीय रुपैयाँ तिर्नुपर्नेछ भने केन्द्रलाई १ सय ५० रुपैयाँ नै उपलब्ध गराइनेछ । सिरम आगामी दुई महिनामा खोपको उत्पादन बढाउने बताएको छ । हाल उत्पादन भएका ५० प्रतिशत खोप केन्द्र र बाँकी ५० प्रतिशत राज्य र निजी अस्पताललाई दिँदै आएको छ ।

कोभिसिल्ड खोप हाफ डोज दिँदा यसको प्रभावकारिता ९० प्रतिशत रहने बताइएको छ । एक महिनापछि फूल डोजमा प्रभावकारिता ६२ प्रतिशत रहेको बताइएको छ । बेलायती नियामक निकायले यसलाई ८० प्रतिशतसम्म प्रभावकारी मानिएको छ ।

विज्ञापन

भारतले १ मेदेखि १८ वर्षका माथिका सबैलाई कोरोनाविरुद्धको खोप दिने घोषणा गरेको छ । यता, नेपालले भने कोभिसिल्ड खोपको १० लाख डोजका लागि अग्रिम भुक्तानी गरे पनि हालसम्म उक्त खोप प्राप्त गर्न सकेको छैन । यसले ज्येष्ठ नागरिकहरूलाई लक्षित खोप अभियान प्रभावित हुनसक्ने चिन्ता विज्ञहरूले व्यक्त गरिरहेका छन्।