काठमाडौं, ३० वैशाख । नेपाली काँग्रेसका सभापति शेरबहादुर देउवा प्रधानमन्त्री बन्नबाट रोकिएका छन् । राष्ट्रपति विद्यादेवी भण्डारीले बहुमतीय सरकार निर्माणको आव्हान गरे अनुसार देउवाले त्यसको पहल गरेपनि असफल भएका हुन् ।

आज साँझ ९ बजेसम्म बहुमतीय सरकार निर्माणका लागि प्रस्ताव लाने समय छ । तर, त्यसमा देउवालाई प्रधानमन्त्री बनाउने प्रस्ताव जाने सम्भावनाको ढोका बन्द भएको छ । प्रधानमन्त्री बन्ने पहल गर्दै देउवाले आज दिनभर मुख्य दलका नेताहरुसँग छलफल गरेका थिए ।

जनता समाजवादी पार्टीका अध्यक्ष महन्थ ठाकुर र वरिष्ठ नेता राजेन्द्र महतोलाई मनाउन देउवाले आज पहल गरेका थिए । बुढानिलकण्ठमा बोलाएर छलफल गरेपनि ठाकुरले साथ दिन नसक्ने जवाफ दिए ।

विज्ञापन

देउवा प्रधानमन्त्री बन्ने सम्भावना नदेखिएपछि प्रचण्डले आजै उनलाई भेटेर सम्भावनाबारे छलफल गरे । विश्वस्त स्रोतका अनुसार विकल्पमा जसपालाई सरकारको नेतृत्व दिने विषय थियो । तर, देउवा त्यसमा तयार नभएको बुझिएको छ । काँग्रेसको रामचन्द्र पौडेल पक्षधर भने महन्थ ठाकुरलाई प्रधानमन्त्री बनाएर जानुपर्ने पक्षमा देखिएको छ ।

नेकपा एमालेको माधवकुमार नेपाल पक्षधर २० सांसदलाई राजीनामा दिन लगाएर अगाडि बढ्ने देउवाको प्रयास पनि सफल भएन । नेपाल पक्षधर २० सांसदको आज राजीनामा आएन । बरु नेपाल ओलीसँग भेटवार्ता गरी सहमति निकाल्न अगाडि बढे ।

देउवा रोकिएपनि अझै बहुमतको सरकार निर्माणको सम्भावना टरेको छैन । विकल्पमा जसपालाई सरकारको नेतृत्व दिने हुनसक्छ । तर, त्यसका लागि देउवा र प्रचण्ड तयार हुनुपर्छ । जसपाको उपेन्द्र यादव र महन्थ ठाकुरबीच पनि सहमति जरुरी छ ।