नेपाली काँग्रेसको केन्द्रीय समिति बैठकस्थलमा कडाइ गरिएको छ। प्रधानमन्त्री तथा काँग्रेस सभापति शेरबहादुर देउवाको निवास बूढानीलकण्ठमा ३ बजेदेखि सुरु भएको बैठकमा सहभागीलाई कालो मास्क निषेध गरिएको छ ।

यस्तै समाचार संकलनका लागि पुगेका सञ्चारकर्मीलाई देउवा लगायतको फोटो मोबाइलबाट खिच्न रोक लगाइएको छ । कालो मास्क लगाउनेलाई गेट मै रोकिएको छ । ‘कालो मास्क खोलेर अर्को मास्क लगाएर मात्रै भित्र पस्न दिइएको छ । सञ्चारकर्मीलाई मोबाइलबाट फोटो खिच्न पनि दिइएको छैन ।’ लोकेन्द्र भट्टले जनाएका छन् ।

पत्रकारहरुले तत्कालीन प्रधानमन्त्री केपी शर्मा ओलीको पालाको जस्तै झझल्को काँग्रेस बैठकमा देखिएको टिप्पणी गरेका छन् । तत्कालीन प्रधानमन्त्री ओलीको कार्यक्रममा कालो मास्क प्रतिबन्ध लगाउने गरिएको थियो भने मोबाइलबाट फोटो खिच्न समेत दिइँदैनथ्यो । त्यही शैली काँग्रेसको बैठकमा पनि देखिएको हो ।

विज्ञापन

काँग्रेस बैठकमा क्रियाशील सदस्यता छानबिन समितिका संयोजक रमेश लेखकले समितिको प्रतिवेदन पेश गरेका छन् । यस्तै काँग्रेस निर्वाचन समितिका संयोजक महादेवप्रसाद यादवले महाधिवेशनका लागि आवश्यक निर्वाचन निर्देशिका पनि प्रस्तुत गरेका छन् । यस्तै बैठकमा महाधिवेशन सार्नेबारे पनि छलफल हुने बताइएको छ ।