काठमाडौं, २८ असार । पूर्वप्रधानमन्त्री माधवकुमार नेपालले बरु राजनीतिबाट सन्यास लिने तर ब्याक नहुने बताएका थिए । उनले शेरबहादुर देउवालाई प्रधानमन्त्री बनाउने प्रस्तावको हस्ताक्षर फिर्ता लिनुलाई राजनीतिक आत्महत्या हुने भन्दै कुनै हालतमा नलिने अडान लिएका थिए । आखिर नेपालले त्यो अडान पूरा गरे ।
आफ्ना खेमाका हस्ती नेताहरु भीम रावल, सुरेन्द्र पाण्डे, घनश्याम भुसाल, गोकर्ण बिष्ट, योगेश भट्टराईले एकपछि अर्को गर्दै साथ छाडे । तर, नेपाल अडानबाट पछि हटेनन् । उनले आयाराम गयाराम भन्दै जाने आउने हुने तर आफू पछि नहट्ने स्पष्ट पारेका थिए । आखिर उनको खेमामा त्यस्तै भयो ।
एमाले अध्यक्ष केपी शर्मा ओलीसँग संघर्ष गर्दा माधव नेपालसँग ४० भन्दा बढी सांसद थिए । नेकपा विभाजित भएपछि विस्तारै उनको शक्ति क्षय हुँदै गयो । उनले विश्वास गरेका सांसदहरुले नै साथ छाडे ।
लालबाबु पण्डित, शेरबहादुर तामाङ, कृष्णभक्त पोखरेल हुँदै प्रत्यक्ष निर्वाचित सांसदहरुले साथ छाडे । ओलीविरुद्ध विपक्षी गठबन्धन बन्यो । गठबन्धनले ओलीविरुद्ध अर्को प्रधानमन्त्री बनाउने गृहकार्य थाल्यो । त्यतिबेला उनलाई योगेश भट्टराईले साथ छाडे । २८ सांसद साथमा रहेकामा योगेशसहित गणेश पहाडीले साथ छाडे । उनको साथमा २६ सांसद रहे । तर, नेपाल ओलीसँग सम्झौता गर्नेभन्दा राजनीतिबाट सन्यास लिने भन्दै अडान लिइरहे ।
देउवालाई प्रधानमन्त्री बनाउन राष्ट्रपति कार्यालयमा १४९ सांसदको हस्ताक्षरसहित प्रस्ताव लाँदा २६ सांसद थिए । तर, देउवाको पक्षमा दाबी नपुगेको भन्दै राष्ट्रपति विद्यादेवी भण्डारीले संसद विघटन गरी चुनावको घोषणाको कदमलाई सदर गरिन् । त्यसपछि विपक्षी गठबन्धन अदालत जाने भयो ।
अदालत जाने निर्णयका बेलामा माधव नेपाललाई केही सांसदले साथ छाडे । उनलाई आफ्नै पक्षका नेताहरु व्यवस्थापन गर्न हम्मे पर्यो । पवित्रा खरेल निरौलासहित ३ सांसदले हात भिके ।
नेपालले फेरि आयाराम गयारामको उदाहरण दिए । सर्वोच्च अदालतको २८ असारमा फैसला आउने टुंगो लाग्यो । त्यसपछि ओली सक्रिय भए । उनले नेपालसँग सहमति गर्न खोजे । नेपाल तयार भएनन् । उनी कुनै हालतमा अदालतको आदेश अघि सहमतिमा हस्ताक्षर नगर्ने पक्षमा पुगे ।
विगतमा काँग्रेस सभापति शेरबहादुर देउवा र माओवादी केन्द्रका अध्यक्ष पुष्पकमल दाहाल प्रचण्डले नेपाल खेमामा ओलीले देखाएको सक्रियताप्रति आशंका गरिरहेका थिए । नेपालले उनीहरुलाई बरु राजनीतिबाट सन्यास लिने तर ब्याक नहुने जवाफ दिएर आश्वस्त पारे ।
एमाले एकताका लागि भन्दै कार्यदल सक्रिय भयो । जसमा नेपाल खेमाका भीम रावल, सुरेन्द्र पाण्डे, गोकर्ण बिष्ट, घनश्याम भुसाल, रघुजी पन्त र भीम आचार्य थिए । कार्यदलले नेपालमाथि सहमतिमा हस्ताक्षर गर्न दबाब दियो । तर, नेपालले चट्टाने अडान लिए । कार्यदलका पन्तबाहेक अरुले हस्ताक्षर गरे । नेपालले त्यसप्रति तिव्र असन्तुष्टि जनाइहाले ।
माधव नेपाललाई अन्तिम समयमा भीम रावल, सुरेन्द्र पाण्डे, गोकर्ण बिष्ट र घनश्याम भुसालले साथ छाडे । यी हस्तीहरुले साथ छाड्दा पनि नेपाल डगमगाएनन् । उनले चट्टाने अडान लिइरहे । राजनीतिमा जे बोल्यो त्यही गर्ने र जे सम्झौता गर्यो त्यो पालना गर्ने सन्देश दिइरहे ।
फेसबुक प्रतिक्रियाहरु