नागरिक रैबार ।
कैलाली २६ साउन । जिल्ला प्रहरी कैलालीले गौरीगंगा नगरपालिका – ९ शंकरपुरबाट हातहतियार सहित २ जनालाई पक्राउ गरेको छ । पक्राउ पर्नेमा कैलारी गाँउपालिका वडा – ९ का ५३ बर्षीय खेम राज चौधरी र धनगढी उपमहानगरपालिका – २ का ४६ बर्षीय मोहित कुमार शाह रहेको जिल्ला प्रहरी कार्यालय कैलालीले जनाएको छ ।
कैलाली जिल्लाको गौरीगंगा नगरपालिका – ९ शंकरपुरबाट १२ बोर थान -१, ऐ.को कार्टिज थान-१ र पोईन्ट टु टु थान-१, ऐ.को गोली १० राउण्ड सहित २ जना पक्राउ परेका हो ।
प्रहरीका अनुसार उनीहरुलाई सोमबार राती ईलाका प्रहरी कार्यालय मसुरिया कैलालीबाट खटिएको प्रहरी टोलीले शंकरपुर स्थित पूर्वपश्चिम राजमार्गमा पश्चिममा पुर्व तर्फ गईरहेको बा १७ च १३१२ नम्बरको जीप चेकजाँच गर्ने क्रममा पक्राउ गरिएको हो ।
पक्राउ परेको हतियार मध्ये १२ बोर थान – १, ऐ.को कार्टिज थान-१ चौधरीको र पोईन्ट टु टु थान-१, ऐ.को गोली १० राउण्ड शाहको रहेको खुलेको प्रहरीले जनाएको छ ।
पक्राउ परेका दुवै जना माथि हातहतियार खरखजाना शीर्षकमा मुद्धा दर्ता गरी थप अनुसन्धान भइरहेको प्रहरीले जनाएको छ ।
प्रहरीले उक्त जीपमा पक्राउ परेका बाहेक धनगढी उपमहानगरपालिका – १ का ४६ बर्षीय रुपक मल्ल र कैलारी गाँउपालिका – ९ बस्ने ३३ बर्षीय योगेन्द्र बहादुर देउवा पनि सवार रहेको जनाएको छ । उनीहरुलाई भने छोडिएको छ ।