बैतडी: सोमबार साँझ बैतडीमा जीप दुर्घटना हुँदा फरार भएका चालक घाइते अवस्थामा फेला परेका छन्। बैतडीको पाटन नगरपालिका ५ अड्तोलाका जीप चालक खेमराज पाण्डे गएराति घाइते अवस्थामा फेला परेको इलाका प्रहरी कार्यालय पाटनका प्रमुख प्रहरी निरीक्षक राजेश शाहीले बताए। उनको डडेल्धुरा अस्पतालमा उपचार भइरहेको बताइएको छ।

दुर्घटनामा परी सुर्नया गाउँपालिका वडा नं ४ का २ जना र पाटन नगरपालिका वडा नं १ सकारका ३ जना गरी ५ जनाको मृत्यु भएको थियो। दुर्घटनामा परी घाइते भएका ५ जना यात्रु मध्ये २ जनाको डडेल्धुरा अस्पतालमा उपचार भइरहेको छ भने तीन जनाको पाटन प्राथमिक स्वास्थ्य केन्द्रमा उपचार भइरहेको प्रहरी निरीक्षक शाहीले बताए।

पाटन नगरपालिका १ सकारका मानध्वज भट्टराई र ओमप्रकाश भट्टराईको डडेल्धुरामा उपचार भइरहेको हो। सकारकै विष्णु भट्टराई, दीपक भट्टराई र गोविन्दी विकको प्राथमिक स्वास्थ्य केन्द्र पाटनमा उपचार भइरहेको छ। यस्तै मृतक ५ जनाको शव परीक्षणका लागि पाटन प्राथमिक स्वास्थ्य केन्द्रमा राखिएको छ।

विज्ञापन