राष्ट्रियसभा सदस्य रमेशजङ्ग रायमाझीले सर्वोच्च अदालतले पूर्ववर्ती सरकारलाई ‘सिस्नुपानी लगाएको’ प्रस्ट पारेका छन् । राष्ट्रियसभाको बुधबार बसेको बैठकमा उनले संविधानको खिलाप हुने गरी पटक पटक संसद विघटन गरेपछि सर्वोच्च अदालतले सिस्नुपानी लाउनु परेको बताए ।

उनले सर्वोच्च अदालतले प्रतिनिधिसभाका १४६ सांसदको माग बमोजिम नै परमादेश जारी गरेको दावी गरे । त्यो परमादेश संविधानमै टेकेर भएको उनको भनाइ थियो । अदालतप्रति विश्वास थिएन भने मुद्दामा भाग लिन्न भनेर किन नभनेको भन्दै उनले प्रतिपक्षसँग प्रश्नसमेत गरे । उनले प्रश्न गरे, ‘आफ्नो पक्षमा निर्णय भए जनादेश, आफ्नो विपक्षमा निर्णय हुनेबित्तिकै परमादेश हुने ?’

केपी शर्मा ओली सत्तामा हुँदा राष्ट्रियसभाको गरिमा राखेर बोल्नुपर्छ भनेको बेलाबखत सुन्ने गरिएको स्मरण गराउँदै उनले प्रतिपक्षमा पुगेपछि त्यो शिष्टता हराएछ भन्दै व्यङ्ग्यसमेत गरे । निर्दलीयताको अभ्यास हुन थाल्यो भनेर प्रतिपक्षबाट हुँदै आएको टिप्पणीप्रति पनि उनले असन्तुष्टि जनाए । उनले प्रश्न गरे, ‘प्रतिनिधिसभामा एमालेको टिकट लिएर जितेर आएका सांसदलाई आफ्नो पक्षमा मत दिन लगाउन नसक्ने, आफ्नो पक्षमा मत नदिएबापत कारवाही गर्न पनि नसक्ने अनि निर्दलीय सरकार भन्ने ?’

उनले आफैले लेखेको संविधानको विपरीत उभिन पनि खबरदारी गरे । उनले प्रश्न गरे, ‘सर्वोच्चले संविधान लेखेको हो ? हामीले संविधान लेख्ने, त्यही संविधानको व्याख्या सर्वोच्चले गर्ने भन्ने अनि सर्वोच्चले व्याख्या गर्दा परमादेशको सरकार भन्ने ?’