नागरिक रैबार/बाजुरा १७ कार्तिक। दोस्रो नगर स्तरीय फुटवल प्रतियोगिताको कप पनि बडीमालिका नगरपालिका ९ ले जितेको छ ।आज सम्पन्न भएको फाइनल खेलमा आयोजक बडीमालिका ८ लाई २-१ ले पराजित गर्दै बडीमालिका ९ दोस्रो नगर स्तरीय कप जितेको हो ।

अघिल्लो वर्ष समेत कप जितेको बडीमालिका ९ ले यस वर्ष पनि उत्कृष्ट खेल प्रर्दशन गर्दै दोस्रो नगर स्तरीय कपको विजेता बन्न सफल भएको हो ।

प्रतियोगिताको विजेता बनेको बडीमालिका ९ ले ट्रफि, मेडल, प्रमाणपत्र सहित ५१ हजार १ सय ११ नगद पुरस्कार राशि मध्ये ३८ हजार नगद प्राप्त गरेको हो । त्यस्तै उपविजेता बनेको आयोजक बडीमालिका ८ ले २१ हजार १ सय ११ नगद सहित प्रमाणपत्र, ट्रफि, मेडल प्रदान गरेको छ ।

विज्ञापन

५ दिनसम्म बाजुरा क्याम्पसको खेलमैदानमा संचालन भएको उक्त प्रतियोगितामा उत्कृष्ठ डिफेण्डर बडीमालिका ९ का स्याम विक घोषित भएका छन् । त्यस्तै उत्कृष्ट खेलाडीमा आयोजकका जिवन रावल र उत्कृष्ट गोलकिपरमा आयोजककै चेत रावल भएका छन् ।

शुभदिपावलीको अवसरमा आयोजना गरिएको दोस्रो नगर स्तरीय 7 Aside फुटवल प्रतियोगिता कार्तिक १२ गतेबाट संचालन भएको भएको थियो । प्रतियोगितामा बडीमालिका नगरपालिका भित्रका ९ वटै वडाका १७ वटा टिम सहभागि भएका थिए ।

नगरपालिका भित्रका खेलाडीहरूकाे प्रतिभालाई पहिचान गराउने उद्वेश्यले बडीमालिका ८ ले तिहारकाे अवसरमा दाेस्राे नगर स्तरीय फुटबल प्रतियाेगिताकाे आयाेजना गरेको र यसलाइ प्रत्येक वर्ष निरन्तरता दिने वडा अध्यक्ष प्रकाश रावलले बताएका छन् ।

बडीमालिका ८ का वडा अध्यक्ष प्रकाश रावलकाे अध्यक्षतामा सम्पन्न भएको पुरस्कार वितरण कार्यक्रममा बडीमालिका नगरपालिकाका नगर प्रमुख पदम बडुवाल प्रमुख अतिथि रहेका थिए । कार्यक्रमको सन्चालन बलवान एडीले गरेका थिए ।