–हेमराज ढकाल ‘सुमन’

हामी त फुट्यौँ कमरेड
धुम्बाराही र पेरिसडाँडा नजाने गरी
एकअर्काको मुहार नहेर्ने गरी
भुलेर ती समाजवादका सपना
सहिदका रगत र बलिदानहरु
हामी फुट्यौँ कमरेड ।

मार्क्स, माओ र लेलिनका सिद्धान्त
पुप्पलाल, मदन र मनमोहनका विचार
यी सबैलाई टोकरी हालेर फेरि
दर्शन र सिद्धान्तभन्दा पनि हामीलाई
पद, शक्ति अनि पैसा ठूलो भो
त्यसैले त हामी फुट्यौँ कमरेड ।

विज्ञापन

गरिबको झुपडीमा दियो जलाउन
गणतन्त्रलाई बलियो बनाउन
कठै ! हाम्रो नीति भयो बदनाम
खै मेरो भाग भन्दै आफू–आफैँ लड्दै
दुनियाँलाई रमिता देखाएर सधैँ
हामी त फुट्यौँ आज ।

रेल, तेल, ग्याँस सबैमा भयो झेल
त्यो अमूल्य मतको मर्म नबुझी
गुटबन्दी र भागबन्डाको खेल खेल्दा
मैदानमा आफैँ पछारिँदा पनि हामीलाई
चेतना बुद्धि र विवेक नआउँदा कहिल्यै
हामी टुक्राटुक्रा भएर फुट्यौँ आज ।